Krishtianu Ronaldu terma jamoalar miqyosida ikkita tarixiy rekord qayd etdi
Portugaliya terma jamoasi hujumchisi Krishtianu Ronaldu Yevro—2024 saralashi doirasida kechgan Lixtenshteynga qarshi o‘yinda (4:0) dubl muallifiga aylandi.
Bu 38 yoshli futbolchi uchun milliy terma jamoa safidagi 197-o‘yin bo‘ldi. Ronaldu bu borada Kuvayt vakili Badir al-Mutvaning rekordini yangilab, terma jamoa safida eng ko‘p o‘yin o‘tkazgan futbolchiga aylandi.
Qayd etish kerak, Xalqaro futbol tarixi va statistikasi federatsiyasi (IFFHS) bu ko‘rsatkich bo‘yicha malayziyalik Son Chin Anni ro‘yxat yetakchisi deb hisoblaydi (219 o‘yin). U rasmiy hisoblanmagan 24 ta o‘yinda ishtirok etgan.
Ronaldu Portugaliya safidagi gollari sonini 120 taga yetkazib olgan holda o‘ziga tegishli rekordni mustahkamladi. Shuningdek, bu Krishtianu uchun rasmiy o‘yinlarda urilgan 100-gol bo‘ldi. Ronaldu bu natijani qayd etgan tarixdagi ilk futbolchi bo‘ldi.
Lixtenshteyn Ronaldu to‘p kiritgan 47-terma jamoaga aylandi. Portugaliyalik futbolchi terma jamoalar miqyosidagi rasmiy o‘yinda ilk bor 2004-yili Gretsiya darvozasini ishg‘ol qilgandi. Hujumchi terma jamoada ketma-ket 20 yil davomida (2004-yildan beri) har yili gol urib kelmoqda.
Ronaldu qatorasiga ikkinchi o‘yinda jarima zarbasidan gol urdi. Avvalroq u “An-Nassr” safida jarima zarbasini muvaffaqiyatli amalga oshirgandi. Qayd etish kerak, Krishtianu bundan avval oxirgi marta 2022-yilning aprelida jarimadan to‘p kiritgandi.
