Fransiyada pensiya islohotiga qarshi 23-mart kungi norozilik namoyishlari chog‘ida yuz bergan tartibsizliklarda 457 kishi hibsga olindi, deb xabar bermoqda mamlakat ichki ishlar vazirligi.
“Fransiya bo‘ylab 457 nafar odam hibsga olingan”, — dedi Fransiya ichki ishlar vaziri Jerald Darmanin CNews telekanalida.
Shuningdek, u namoyishchilar bilan to‘qnashuvlar chog‘ida 441 nafar politsiya va jandarmeriya zobiti yaralanganini aytdi. Darmaninning qo‘shimcha qilishicha, Parijda “shahar mulki va chiqindi konteynerlariga o‘t qo‘yish bilan bog‘liq 933 ta holat” qayd etilgan.
Fransiya ichki ishlar vazirligi rahbari norozilik harakatining “radikallashuvi”dan xavotir bildirdi. Uning so‘zlariga ko‘ra, shu hafta Fransiya Milliy politsiyasining Bosh inspeksiyasi aksiyalar davomida namoyishchilarning harakatlari bilan bog‘liq 11 ta tekshiruv boshlagan.
23-mart kuni kechqurun Parijda va Fransiyaning boshqa bir qator shaharlarida pensiya islohotiga qarshi ommaviy norozilik namoyishlari o‘tkazildi va bu tartibsizliklarga aylanib ketdi. Namoyishchilar huquq-tartibot xodimlariga tosh, qo‘lbola portlovchi modda solingan shishalar uloqtirdi. Bordoda namoyishchilar shahar meriyasining kirish qismiga o‘t qo‘ydi, Tuluza va Lionda turli portlashlar uyushtirdi.
16-mart kuni Fransiya hukumati 49.3 konstitutsiyaviy moddadan foydalangan holda, Milliy assambleyada ovozga qo‘ymasdan, pensiya yoshini 62 yoshdan 64 yoshga oshirishga qaror qilgandi. Bunga javoban parlament quyi palatasining muxolifatdagi fraksiyalari 20-mart kuni hukumatga ikki marta ishonchsizlik votumini ovozga qo‘ydi, ularning har ikkisi ham zaruriy ko‘pchilik ovozni ololmadi.
Bundan tashqari, bosh vazir Elizabet Bornni ishdan bo‘shatish uchun ovoz berishda to‘qqizta ovoz yetmadi. Ijroiya hokimiyatiga ishonchsizlik bildirishga urinishlar muvaffaqiyatsizligi natijasida pensiya islohoti Milliy Assambleya tomonidan qabul qilingan deb hisoblanmoqda.
20-mart kuni kechqurun Parij va boshqa hududlarda rejalashtirilmagan norozilik namoyishlari boshlandi.
Izoh (0)