Faoliyatida yo‘l qo‘ygan qonunbuzilish holatlari uchun ishdan olingan Asaka tumani sobiq hokimiga sud hukmi o‘qildi
Andijon viloyati, Asaka tumani sobiq hokimi Mansur Alixonovga nisbatan nisbatan Jinoyat kodeksing 5 ta moddasi bo‘yicha jinoyat ishi qo‘zg‘atilgan. Bu haqda Andijon viloyati prokuraturasida bo‘lib o‘tgan matbuot anjumanida maʼlum qilindi, deya xabar bermoqda “Daryo” muxbiri.
Xabarga ko‘ra, Mansur Alixonovga nisbatan jinoyat kodeksing 5 ta moddasi bo‘yicha Jinoyat ishi qo‘zg‘atilgan, sud tomonidan unga ozodlikdan cheklash jazosi qo‘llanilgan.
2022-yilning 27-sentyabr kuni Prezident administratsiyasi rahbari Sardor Umurzoqov rahbarligida o‘tkazilgan videoselektor yig‘ilishda yer munosabatlarini tartibga solishga oid qonunchilik hujjatlariga rioya etmagani, faoliyatida yo‘l qo‘ygan boshqa jiddiy qonunbuzilish holatlari uchun Mansur Alixonov tuman hokimi lavozimidan ozod etilgandi.
“Asaka tumani hokimi janob Alixonov. Yer ajratish masalasida 56 ta qaror bilan 2 ming 390 gektar yer noqonuniy ajratilgan. 2021—2022-yillarda, bir yarim yilning ichida yer bilan bog‘liq noqonuniy holatlar bo‘yicha 15 ta jinoiy ish qo‘zg‘atilgan. Shuning uchun bugun prezidentimizning qarorlari bilan siz ham lavozimingizdan ozod etilasiz”, — degan edi Sardor Umurzoqov.
Faqat yer ajratish emas, 2021-yilning dekabr oyida Asaka tumani hokimi Mansur Alixonov aholi bilan nomaqbul tarzda suhbatlashgani aks etgan video tarqalgandi. Holat ijtimoiy tarmoqlarda keng muhokamalarga va jamoatchilikning e’tirozlariga sabab bo‘lgandi.
Mansur Alixonov 2020-yilning sentabr oyida Asaka tumani hokimi lavozimiga tayinlangan. U mazkur tayinlovga qadar Jalaquduq tumani IIB boshlig‘i lavozimida faoliyat yuritgan.
