2023-yilgi zakot nisobi, fitr sadaqa va fidya miqdori belgilandi

O‘zbekiston Musulmonlari idorasi Fatvo markazi 2023-yil (hijriy 1444) uchun zakot nisobi, fitr sadaqa va fidya miqdorini e’lon qildi.

Unga ko‘ra, 2023-yilda zakot nisobi 35 million 700 ming so‘m etib belgilandi. Shu va shundan ortiq mablag‘ga ega bo‘lgan kishi jami daromadining qirqdan biri (2,5 foiz)ni ajratib, uni zakot niyatida ehtiyojmandlarga beradi.

Shuningdek, fitr sadaqasi va fidya miqdori ham belgilandi. Markaz xabariga ko‘ra:

• bug‘doy 2 kilogramm — 12 ming so‘m;
• arpa 4 kilogramm — 20 ming so‘m;
• mayiz 2 kilogramm — 100 ming so‘m;
• xurmo 4 kilogramm — 180 ming so‘m.

“Har kim o‘z imkoniyatiga qarab ushbu to‘rt mahsulotning xohlagan bir turidan fitr sadaqasi yoki fidya miqdorini bersa kifoya qiladi”, — deyiladi markaz xabarida.