O‘zbekiston investitsiyalar, sanoat va savdo vaziri Laziz Qudratov Mareven Food Holdings (Vyetnam) kompaniyasi direktori Nguyen Duong bilan videokonferensiya tarzida muzokaralar o‘tkazdi. Bu haqda ISSV matbuot xizmati xabar berdi.
Qayd etilishicha, uchrashuvda 125 million dollarlik tez tayyorlanadigan oziq-ovqat mahsulotlari, alkogolsiz ichimliklar, quritilgan sabzavotlar, chipslar ishlab chiqaradigan yirik zavodni qurish bo‘yicha navbatdagi tadbirlar atroflicha muhokama qilingan. Loyiha Toshkent viloyatidagi “Angren” erkin iqtisodiy zonasi hududida amalga oshirilib, 800 ta yangi ish o‘rni yaratiladi.
Muzokaralar chog‘ida vyetnamlik hamkorlar kompaniya mahsulotlarini qabul qilish va O‘zbekiston hamda Markaziy Osiyo mamlakatlari bozorlariga tarqatish maqsadida Toshkent viloyatida logistika markazi faoliyatini tashkil etish bo‘yicha olib borilayotgan ishlarning joriy holati haqida ham so‘zlab bergan. O‘zbekiston tomoni kompaniyaning mamlakatdagi sarmoyaviy tashabbuslarini amalga oshirishda yordam berishga tayyorligini bildirgan.
“Uchrashuv yakunlari bo‘yicha tomonlar O‘zbekistonda Mareven Food Holdings kompaniyasining ishlab chiqarish va logistika obʼyektlarini ishga tushirish va yangi ish o‘rinlari yaratishni nazarda tutgan holda loyihalarni muvaffaqiyatli amalga oshirish yuzasidan hamkorlik qilish tartibini kelishib oldilar”, — deyiladi xabarda.
Ma’lumot uchun, Mareven Food Holdings qishloq xo‘jaligi mahsulotlarini qayta ishlash, oziq-ovqat mahsulotlarini ishlab chiqarish va tarqatish bo‘yicha loyihalarga sarmoya kiritish sohasida faoliyat yuritadi. Kompaniyaning xalqaro portfeliga Rollton, Bigbon, Mareven Professional Food, Petra, Actibo brendlari kiradi.
Avvalroq O‘zbekiston va Vyetnam neft-gaz va neft-kimyo sanoatida qo‘shma loyihalarni amalga oshirishi kutilayotgani to‘g‘risida xabar berilgandi.
Izoh (0)