O‘zbekiston U-20 darvozaboni Otabek Boymurodov OFK tomonidan o‘tkazilgan so‘rovnomada g‘olib bo‘ldi

Futbol bo‘yicha O‘zbekiston U-20 terma jamoasi darvozaboni Otabek Boymurodov OFK tomonidan “Kelajak yulduzi” nomiga loyiq ko‘rildi.

OFK tomonidan muxlislar o‘rtasidagi o‘tkazilgan so‘rovnomada Boymurodovdan tashqari Ali Jasim Aloibi (Iroq), Naoki Kumata (Yaponiya) va Kim Yon Hak (Janubiy Koreya) ham g‘oliblikka da’vogar edi.

So‘rovnomada Otabek 35,3% natija bilan birinchi bo‘ldi. Keyingi o‘rinlardan mos ravishda Jasim (29,5%), Kumata (29,5%) va Yon Hak (5,8%) joy oldi.

Otabek Boymurodov O‘zbekistonda o‘tkazilgan musobaqaning eng yaxshi darvozaboni sifatida e’tirof etilgandi. 19 yoshli o‘zbekistonlik futbolchi musobaqa davomida olti o‘yindan beshtasida o‘z darvozasi daxlsiziligini saqlab qoldi. Bundan tashqari Janubiy Koreyaga qarshi o‘tgan yarim final o‘yinidagi penaltilar seriyasida o‘z seyvlari bilan jamoaning final yo‘llanmasini qo‘lga kiritishiga hissa qo‘shdi.