Buxoroda ikki yigit behayo videolarini tarqatmaslik uchun tanishidan pul talab qildi

Buxoro shahrida 2005-yilda tug‘ilgan ikki yigit o‘z tanishidan behayo videolarini tarqatmaslik uchun pul talab qildi. Bu haqda viloyat Ichki ishlar boshqarmasi axborot xizmati xabar berdi. 

Xabarga ko‘ra, Buxoro shahrida yashovchi 2005-yilda tug‘ilgan yigitlar bir guruh bo‘lib, shaxs uchun sir saqlanishi lozim bo‘lgan maʼlumotlarni oshkor qilish bilan qo‘rqitib, Jondor tumanida yashovchi tanishi bo‘lgan qizga tahdid qilib kelgan. Ular qizni behayo videolarini tarqatish va sharmanda qilish bilan qo‘rqitgan. 

Maʼlum bo‘lishicha, yigitlar 6-fevraldan boshlab undan bir necha bor pul talab qilgan. Oxirgi marotaba esa talab qilingan 15 million so‘mdan 9 million 900 ming so‘m olgan. Shundan so‘ng jabrlanuvchini yana 4 million 100 ming so‘m berishga majbur qilgan. 

Qizning viloyat IIBga murojaati asosida tezkor tadbir o‘tkazilgan. Tadbir davomida ushbu ikki yigit Buxoro shahar pedogogika instituti oldida talab qilingan pullarni olgan vaqtida ushlangan. 

Holat yuzasidan Jinoyat kodeksining 165-moddasi 2-qismi bilan jinoiy ish qo‘zg‘atilib, hozirda tergov harakatlari olib borilmoqda.