Qashqadaryodagi mavjud yer-maydonlarining 2,5 mln gektari Uzkad tizimiga kiritilgani maʼlum bo‘ldi
Qashqadaryo viloyatining shahar va tumanlaridagi mavjud yer-maydonlarining 2,5 million gektari Uzkad tizimiga kiritilgani maʼlum bo‘ldi. Bu haqda Davlat kadastrlari palatasi Qashqadaryo viloyati boshqarmasi boshlig‘i G‘ayrat Hamroyev Milliy matbuot markazida bo‘lib o‘tgan matbuot anjumanida maʼlum qildi.
Taʼkidlanishicha, 2022-yil davomida Davlat kadastrlari palatasi Qashqadaryo viloyati boshqarmasi va uning tuman, shahar filiallari tomonidan viloyatning mavjud 2,9 million gektarga yaqin yer maydonlaridan 2,5 million gektari milliy geoaxborot tizimi yoki Uzkad yagona integratsiyalashgan dasturida aks ettirilgan.
“Ilgari yer balansi hisobotlari faqatgina qog‘oz jadvallaridagi raqamlarda yuritilganligi bois tegishli o‘zgartirishlarni kiritib borish inson omiliga bog‘liq bo‘lib, qo‘lda kiritib kelingan. Uzkad yagona integrasiyalashgan dasturda esa yer maydonlarining bo‘linishi, chegaralari va yerga oid barcha maʼlumotlar elektron xaritalarda shakllantirilganligi, barcha yerdan foydalanuvchilarning huquqlari kafolatlanganligi, yer va mulk soliqlarining hisoblanishi va to‘lanishida shaffoflik tamoyillari taʼminlanganligi kabi ijobiy natijalari ko‘rish mumkin”, — deydi boshqarma boshlig‘i G‘ayrat Hamroyev.
Matbuot anjumanida, shuningdek, aholiga ko‘rsatilgan kadastr xizmatlari haqida ham maʼlumot berilgan.
Qayd etilishicha, ko‘chmas mulklarga kadastr pasportlarini shakllantirish yuzasidan 2022-yil davomida jami 48 mingdan ziyod arizalar kelib tushgan. 2021-yilga nisbatan arizalar soni 11 ming 400 taga oshgan, shuningdek, yer va bino inshootlarga bo‘lgan huqularni davlat ro‘yxatidan o‘tkazish yuzasidan 60 ming 300 ta ariza kelib tushgan bo‘lib, bunda arizalar 14 mingtaga ko‘paygan.
“Arizalar soni aholiga ko‘rsatilayotgan xizmatlarga fuqarolarning ishonchi ortganidan darak beradi”, — deydi boshqarma axborot xizmati rahbari Namoz Choriyev.
