Silk Avia milliy aviakompaniyasining birinchi samolyoti Toshkentga kelib qo‘ndi

Transport vazirligi matbuot xizmati Silk Avia milliy aviakompaniyasining birinchi samolyoti Toshkentga kelib qo‘nganini e’lon qildi.

Qayd etilishicha, aviakompaniyaning birinchi samolyoti 21-mart kuni mahalliy vaqt bilan soat 08:30 da Toshkent xalqaro aeroportida an’anaga ko‘ra, tantanali ravishda suv arkasi va ekipaj a’zolarini karnay-surnay sadolari ostida gullar bilan kutib olindi.  

Yo‘lovchi sig‘imi 70 kishilik ATR 72-600 samolyoti dunyodagi eng mashhur qisqa masofaga uchuvchi samolyotlardan biri hisoblanadi. 

Airbus A320 ga nisbatan to‘rt baravar kam yonilg‘i sarflaydigan xavfsiz va tejamkor, arzon samolyot yo‘lovchilarga hamyonbop narxda ishonchlilik va qulaylikni taqdim etadi.

Ma’lumot uchun, Silk Avia 2021-yilning noyabrida tashkil etilgan. Mazkur aviakompaniya mamlakat ichida aviaqatnovlarga bo‘lgan talabni qondiradi. O‘zbekiston bo‘ylab 40 ga yaqin yo‘nalish — nafaqat poytaxtdan viloyatlarga, balki viloyatlar o‘rtasida ham yo‘lga qo‘yilishi rejalashtirilgan.