Sahnada Gulasal-u Nargis, Ravshan Komilov va Kozim Qayumov: Toshkent viloyatida mashhurlar ishtirokida bo‘lib o‘tgan Navro‘z — suratlarda

Barcha viloyatlarda bo‘lgani kabi yangilanish va yasharish bayrami Navro‘zi olam Toshkent viloyatida ham ko‘tarinki kayfiyatda kutib olindi. Bu haqda “Daryo”ga viloyat hokimligi axborot xizmati xabar berdi.

Qayd etilishicha, Navro‘z tantanalarida O‘zbekistonda mashhur xonanda-yu, xalq artistlari ishtirok etgan. Sahnada Gulasal Abdullayevadan tortib xonanda Nargisgacha, Ravshan Komilovdan Kozim Qayumovgacha ko‘rinish berib, aholi kayfiyatini ko‘tarishga uringan.

“Shuni alohida taʼkidlash mumkinki, anʼanaga muvofiq, ulug‘ ayyom kunlari viloyatimizda 100 dan ortiq ijtimoiy obyektlar, ishlab chiqarish va xizmat ko‘rsatish korxonalari foydalanishga topshirildi. Xususan, 30 ga yaqin mahalla fuqarolar yig‘ini binolari, 11 ta sport obyektlari, umumtaʼlim maktablari va maktabgacha taʼlim tashkiloti hamda 3 ta tibbiyot muassasalari mukammal taʼmirlanib aholi ixtiyoriga berildi. Shundan 136 ta suv taʼminoti va oqova suv obyektlarida qurilish-taʼmirlash ishlari olib borilib, bugun ko‘plab oilalarga toza ichimlik suvi kirib bordi”, — deydi viloyat hokimligi axborot xizmati rahbari Behzod Qobulov.

Qo‘shimcha qilinishicha, Navro‘z tantanalari doirasidagi tadbirlar Mehribonlik, Muruvvat hamda Saxovat uylari, maxsus maktab-internatlarida ham davom etgan.

“Ushbu maskanlarda viloyat hokimligi bo‘lim va boshqarmalari, jamoat tashkilotlari tomonidan bayram dasturxonlari yozilib, konsert dasturlari namoyish etilmoqda. Qariyalar, nogironlar, bemorlar va muhtojlar holidan xabar olindi”, — deydi masʼul.