Rajab Adashev aktyor sifatidagi eng katta kamchiligi haqida gapirib berdi (video)
O‘zbekiston xalq artisti Rajab Adashev “Daryo” internet-nashriga eksklyuziv intervyu berdi. Intervyuni “Daryo” muxbiri Feruz Muhammad tashkillashtirdi.
“Men uchun yig‘lash juda og‘ir”
— O‘ta iste’dodli aktyorlarda rol ijro etayotgan paytida yig‘i keladi, o‘zim ham besh ketaman shunday aktyorlarga. Menga esa qiyin, men yig‘lay olmayman. O‘ta isde’dodli aktyor emasligimni tan olishga majbur bo‘ladigan joyim shu. Kimningdir o‘lganini xotirlayman yoki eng yaqin insonimni kasal holda ko‘z oldimga keltirib, o‘sha vaziyatda ko‘zimdan yosh chiqarganman. Men uchun yig‘lash juda og‘ir.
Kino u paytda bitta kamerada, tasmada olinardi. Hozirgi videolarda kamida 5 ta dubl olinyapti, bir dubl ikki-uch marta takrorlanishi ham mumkin. Ko‘z yoshi esa bir marta keladi. Uni ikkinchi dublda ham, uchinchi dublda ham chiqarish kerak. Har qanday aktyorga ham qiyin, eng mahoratli aktyorga ham bu jarayon qiyinchilik tug‘diradi. Menga esa ikki hissa qiyin. Haligi o‘lgan odamni yana o‘ldirish, kasal yotgan odamni yana kasal holda tasavvur qilish juda og‘ir. Shuning uchun ba’zida “Menikini bitta dublda olinglar” deb aytib qo‘yaman.
“Agar dubl beshtagacha cho‘zilsa, rejissorlar aktyorlarni so‘kardi”
— “Abdullajon” filmida men va To‘ti Yusupova bilan bog‘liq sahnalar faqat bitta dublda olingan. Chunki u chet eldan olib kelingan “Kodak” rusumli qimmat tasmaga tushirilgan. Rossiyadan chiqarilgan plyonkalarda 3-4 dublgacha olinaverardi. Agar dubl beshtagacha cho‘zilsa, rejissorlar aktyorlarni so‘kardi. “Abdullajon”dagi bola bilan bog‘liq sahnalarga ikkita dublga ruxsat berilgan edi, bolalar uchun imtiyoz bor edi. Xato qilishga haqqimiz yo‘q edi. Toki rejissor o‘zi qoniqmaguncha faqat repititsiya va mashq qilardik.
Ma’lumot uchun, Rajab Adashev 1944-yil 15-iyul kuni Samarqand viloyati Urgut tumanida tug‘ilgan. Ostrovskiy nomidagi Toshkent teatr va san’at institutining aktyorlik fakultetini tamomlagan. Kinodagi faoliyati 1964-yildan boshlangan. 100 dan ortiq filmlarda rol ijro etgan.
Rajab Adashev 1993-yilda “Abdullajon” filmidagi “Eng yaxshi erkak roli uchun” mukofot, 1997-yilda O‘zbekistonda xizmat ko‘rsatgan artist, 2010-yilda O‘zbekiston xalq artisti, 2021-yilda “Do‘stlik” ordeni, 2022-yilda San’at va madaniyat fidokori”, “Mehnat faxriysi”, “Kinematografiya fidokori” kabi unvon va mukofotlarga munosib ko‘rilgan.
Batafsil reportajni quyida tomosha qilishingiz mumkin.
