Zelenskiy Putinning hibsga olinishiga berilgan orderni “burilish nuqtasi” deb atadi

Xalqaro jinoiy sudning Rossiya prezidenti Vladimir Putinni hibsga olish borasidagi qarori Ukraina uchun muhim xalqaro huquqiy natijaga aylandi. Bu haqda Vladimir Zelenskiy o‘zining navbatdagi videomurojaatida ma’lum qildi.

“Bu — burilish nuqtasi. Mazkur bosqinchilik yakunlanishi bilan Rossiya barcha jabhada shubhasiz javobgarlikka tortilishini anglatadigan nuqta”, — deydi Zelenskiy.

Xalqaro jinoiy sud (XJS) 17-mart kuni Vladimir Putin va bolalar ombudsmani Mariya Lvova-Belovani hibsga olishga order berdi. Ular ukrainalik bolalarni Rossiyaga majburan deportatsiya qilishda ayblanmoqda. Putin Rim statusini ratifikatsiya qilgan dunyoning 123 ta davlatidan istalganida tribunal talabiga binoan hibsga olinishi mumkin. Xalqaro jinoiy sudda sirtdan sud jarayoni amalga oshirish mumkin emas: sudlanuvchiga faqat ekstraditsiya qilingan taqdirdagina hukm chiqarilishi mumkin. Ya’ni Putinning ishi sudda ko‘rib chiqilishi uchun u shaxsan Gaagada bo‘lishi kerak, buning ehtimoli juda past ekani aytilmoqda.

Mazkur qaror Rossiya hukumati va diplomatlari tomonidan keskin tanqid qilinmoqda. Mamlakat Tashqi ishlar vazirligi XJS qarorini “yuridik notavonlik” deb atagan. “Xalqaro jinoiy sudning qarori mamlakatimiz uchun hech qanday ahamiyatga ega emas, jumladan, huquq nuqtai nazaridan ham”, — deydi vazirlik vakili Mariya Zaxarova.

AQSH prezidenti Jo Bayden sud qarorini asosli deb atagan. Germaniya esa Rossiya prezidenti mamlakatga tashrif buyurgudek bo‘lsa, darhol hibsga olishini bildirgan. JAR “yuridik majburiyatlari”dan xabardor ekani va tomonlar bilan vaziyatni muhokama qilishini ta’kidlagan.