Turkiyaning janubi-sharqidagi vayronkor zilzila qurbonlari soni 50 096 nafarga yetdi, deb ma’lum qildi Turkiya tabiiy ofatlarga qarshi kurash va favqulodda vaziyatlar boshqarmasi (AFAD) rahbari Yunus Sezer.
Mamlakatda zilzilalardan jabrlanganlarning umumiy soni 107 ming 204 nafarni tashkil etmoqda. Sezerning so‘zlariga ko‘ra, zilzilalardan keyin mintaqada 35 mingdan ortiq qutqaruvchi ishlagan.
6-fevral kuni Turkiyada 7,7 magnitudali zilzila sodir bo‘ldi. Undan keyin bir qator kuchsizroq aftershoklar kuzatildi. Tabiiy ofatdan ko‘rilgan zarar 100 milliard dollardan oshdi.
Fevral oyi oxirida Turkiyada binolarning zilzilada qulab tushishi bo‘yicha tekshiruvlar boshlandi. 200 dan ortiq odam qamaldi, 1000 ga yaqin kishi qo‘lga olindi. Mutaxassislarning taʼkidlashicha, vayron bo‘lgan binolarning aksariyati sifatsiz materiallardan foydalangan holda va qoniqarsiz usullar bilan qurilgan.
O‘zbekiston Turkiyadagi zilzila markazi bo‘lgan Hatay viloyati hududida uy-joy, maktab va bir qancha obyektlar qurmoqchi. Shavkat Mirziyoyev Turkiy davlatlar tashkilotining navbatdan tashqari sammitidagi nutqida bu haqda maʼlum qilgan.
Izoh (0)