Tojikistonning Dushanbe shahrida sodir bo‘lgan yo‘l transport hodisasi oqibatda O‘zbekiston fuqarosi vafot etdi. Bu haqda Asia-Plus xabar berdi.
Hodisa Zarafshon mikrorayonidan o‘tuvchi Zarnisor ko‘chasi chorrahasida sodir bo‘lgan. Mashina katta tezlikda beton panjaraga borib urilgan. Tezlik shunchalik yuqori bo‘lganki, zarbadan avtomobil ikki qismga bo‘linib ketgan, keyin esa orqa qismi yonib ketgan. Mashinani o‘zbekistonlik 22 yoshli yigit boshqargan. Hodisa 17-martdan 18-martga o‘tar kechasi, mahalliy vaqt bilan taxminan soat 01:00 da sodir bo‘lgan.
Aniqlanishicha, Mercedes-Benz rusumli avtomashina haydovchisi boshqaruvni yo‘qotib qo‘ygan, u olgan tan jarohati oqibatida vafot etgan. Qutqaruvchilar Ichki ishlar vazirligi xodimlari bilan birgalikda yong‘inni o‘chirgan va avariya oqibatlarini bartaraf etgan. Dushanbe ichki ishlar vazirligi marhumning shaxsini aniqlagan, u Namangan viloyatida yashovchi 22 yoshli yigit bo‘lgan.
Izoh (0)