Buxoroda televizor ustasi o‘zganing uyidagi muzlatkich ichida bo‘lgan pullarni o‘g‘irladi

Buxoro viloyati G‘ijduvon tumanida tanishining muzlatkich ichiga yashirilgan pullarini o‘g‘irlagan shaxs aniqlandi, deb xabar beradi viloyat IIB axborot xizmati.

Qayd etilishicha, 9-mart kuni G‘ijduvon tumani “Abdulla Qahhor” mahallasida yashovchi 50 yoshli B.L. o‘zganing mulkini yashirin ravishda talon-taroj qilish maqsadida, “Chorsu” mahallasida yashovchi tanishining yashash xonadoniga televizorni tuzatib berish uchun borgan.

Usta u yerda spirtli ichimlik isteʼmol qilib, A.E.ning muzlatkichi ichida bo‘lgan 4 million so‘m pullarni yashirin ravishda o‘g‘irlab, hodisa joyidan nomaʼlum tomonga yashiringan.

Hozirda holat yuzasidan Jinoyat kodeksining 169-moddasi (O‘g‘rilik) 1-qismi bilan jinoyat ishi qo‘zg‘atilib, dastlabki tergov harakatlari olib borilmoqda.

Avvalroq Andijon viloyati Buloqboshi tumanida o‘zganing xonadoniga yashirincha kirib,  4,5 ming dollar va tilla taqinchoqlarni o‘g‘irlagan shaxs ushlangani to‘g‘risida xabar berilgandi.