Amazon yana 9 ming nafar xodimini ishdan bo‘shatmoqchi
Amazon kompaniyasi turli bo‘limlaridan yana 9 ming kishini ishdan bo‘shatishni rejalashtirmoqda. Bu haqda kompaniya rahbari Endi Jessining xodimlarga yo‘llagan maktubiga tayanib, “Interfaks” xabar berdi.
Kelgusi haftalarda amalga oshiriladigan ishdan bo‘shatishlar Amazon Web Services bulutli bo‘limi ishchilariga, texnologiya ishlab chiquvchilari va reklama bo‘limi xodimlariga, shuningdek, Twitch striming xizmatiga ta’sir qiladi.
“Qiyin qaror bo‘ldi, lekin bu uzoq istiqbolda kompaniyaga foyda keltiradi”, — deb yozadi Jessi o‘z bildirishnomasida.
Amazon rahbariyati yanvar oyi boshida 18 000 dan ortiq ish o‘rinlarini qisqartirishini e’lon qilgandi.
Amazon aksiyalari 20-mart kungi savdolarda 1,5 foizga arzonlashdi. Yil boshidan beri kompaniya kapitallashuvi 16 foizga o‘sib, 1,01 trillion dollarni tashkil etdi.
