Afrika janubi-sharqiga yopirilgan “Freddi” tropik bo‘roni Madagaskar, Malavi va Mozambikda kamida 522 kishining umriga zomin bo‘ldi. Bu haqda ushbu mamlakatlar hukumatlariga tayanib, Deutsche Welle agentligi xabar berdi.
Qurbonlarning aksariyati Malavi hisobiga to‘g‘ri kelmoqda — u uch mamlakatdan eng kichigi va dunyodagi eng qashshoq davlatlardan biridir. Ushbu mamlakatda tabiiy ofat oqibatida 438 kishi halok bo‘lgan. Yana yog‘ingarchilik, suv toshqinlari va ko‘chkilar oqibatida 345 ga yaqin odam jarohatlangan. Mamlakat janubida favqulodda holat rejimi e’lon qilindi.
Mozambik prezidenti Felipe Nyusining so‘zlariga ko‘ra, bo‘ron oqibatida mamlakatda kamida 67 kishi halok bo‘lgan. Madagaskar hukumati qurbonlar soni 17 kishini tashkil etayotganini bildirgan.
Hind okeanida shakllangan “Freddi” tropik bo‘roni 21-fevral kuni Madagaskarga yopirilgan edi. Shundan keyin u ko‘rfaz orqali qit’aga o‘tib, yana orolga “qaytgan”, 11-martda Mozambik va Malavi hududiga yopirilgan — uning yuzaga kelganiga bir oydan oshdi. Jahon meteorologiya tashkiloti ma’lumotlariga ko‘ra, “Freddi” eng uzoq vaqt kuzatilgan bo‘ronga aylanishi mumkin.
Izoh (0)