Doshqozonlardagi sumalak, 40 qozondagi osh, tandirdan uzilgan ko‘k somsa: Farg‘onadagi Navro‘z tantanalari — suratlarda

Farg‘ona viloyatining barcha tuman va shaharlarida Navro‘zi olam — sharqona yangi yil munosabati bilan xalq sayillari, tomosha va konsertlar bo‘lib o‘tmoqda. Viloyatning asosiy bayram tantanalari Farg‘ona shahridagi Islom Karimov nomidagi teatr-konsert saroyi xiyobonida xalq sayli tarzida o‘tkazildi. Bu haqda “Daryo” muxbiri Azizjon Ermatov xabar bermoqda.

Xiyobon erta tongdanoq minglab farg‘onaliklar bilan gavjum bo‘ldi. Bayram ishtirokchilari karnay-surnay sadolari ostida kutib olindi.

Xalq sayillari sportchi yoshlarning ko‘rgazmali chiqishlari, dor va milliy o‘yinlar musobaqalari bilan boshlandi. Kurash, tosh ko‘tarish, arqon tortish, varraklar sayli, xalq amaliy san’ati — folklor namunalari, bir-biridan mazali milliy taomlar tanlovlari o‘tkazildi.

Sayillarda viloyatdagi qirg‘iz, tojik, rus hamda koreys milliy madaniy markazlari faollari ham o‘z odat va an’analari aks etgan chiqishlari bilan ishtirok etdi.

Bayram tadbirida viloyatdagi tuman va shaharlar tomonidan maxsus pavilyonlar tashkil etilib, o‘sha hududga xos urf-odatlar ko‘rsatib berildi, milliy taomlar va hunarmandchilik mahsulotlari ko‘rgazmalari namoyish etildi. Sayil ishtirokchilariga chalpak va bahoriy taomlar tortiq qilindi.

Xiyobon bo‘ylab o‘rnatilgan 15 ta doshqozonda Navro‘zning shoh taomi — sumalak qaynadi, 40 ta qozonda osh damlandi, 40 ta tandirda esa ko‘k somsalar yopilib, bayram ishtirokchilariga tarqatildi.

Sayil davomida ulkan qozonda ikki yarim tonna osh damlandi, 10 metrli tort va 10 metrli pitssa tayyorlandi. O‘zbekistondagi eng uzun – 55 metrlik lavash tayyorlash jarayonini ham yuzlab sayil ishtirokchilari katta qiziqish bilan kuzatdi.

Folklor guruhlari, xalq ansambllari tomonidan xalqona kuy-qo‘shiqlar, o‘lan-laparlar ijro etildi.

Bayram tantanalarida viloyat hokimi Xayrullo Bozorov ishtirok etib, bayram dekoratsiyalari, milliy hunarmandchilik buyumlari, bahoriy taomlar ko‘rgazmalari bilan tanishdi.

Botir Qodirov, Nilufar Usmonova, Gulasal Abdullayeva, Ilhom Ibrohimov, Yahyobek Mo‘minov kabi taniqli san’atkorlar, yosh ijrochilar, badiiy havaskorlik jamoalari ishtirokidagi konsert dasturi farg‘onaliklarga bayramona kayfiyat ulashdi.

Bog‘ va xiyobonlarda bayram tantanalari va xalq sayillari davom etmoqda.

Muxbir:

Azizjon Ermatov