Toshkent viloyati Yuqori Chirchiq tumanida 26 yoshli ayolni beton bo‘lagi bilan urib o‘ldirgan erkakka hukm o‘qildi. Bu haqda “Sevimli” telekanalining “Zamon” informatsion dasturida ma’lum qilindi.
Qayd etilishicha, ayblanuvchi 2022-yil 26-sentabr kuni soat 22:30 larda spirtli ichimlik iste’mol qilib, Navro‘z ko‘chasida yashovchi M.M. ismli ayolning uyiga borgan. Erkak unga o‘rtalarida go‘yoki ishqiy munosabat bo‘lganini vaj qilib, ayoldan pul undirish maqsadida uning uyiga bostirib kirgan.
“Uyiga kirib qo‘l ko‘tardim. ‘Darvozani ochaman, hozir mahalladagilarni chaqiraman’, degan paytida o‘zimda emas edim”, — deydi ayblanuvchi. Marhuma bilan o‘zaro kelisha olmaganini sabab qilib ko‘rsatgan erkak hovlidagi 20-25 kilogrammli beton bo‘lagi bilan qochishga urinib, yiqilgan ayolning yuz va bosh sohasiga urgan.
Ayol voqea joyida vafot etgan. Erkak esa uy ichiga kirib, 1,9 million so‘m miqdoridagi pulni olib voqea joyidan qochib ketgan.
Ayblanuvchi A.R. Jinoyat kodeksining 97-moddasi (qasddan odam o‘ldirish) 2-qismi bilan aybli deb topilib, 19 yil muddatga ozodlikdan mahrum etish jazosi tayinlandi.
Izoh (0)