“Barselona” va “Real” o‘rtasidagi munosabatlar yomonlashishi mumkin. Madrid klubi “ko‘k-anorranglilar”ning “Negreyra ishi” bo‘yicha sudida ishtirok etishga rozilik bergan

Madridning “Real” jamoasi “Barselona”ning hakamlar bilan bog‘liq korrupsiya holati bo‘yicha bayonot berdi. 

Avvalroq Barselona prokuraturasi klub va uning sobiq prezidentlari Xosep Bartomeu va Sandro Roselni sudga bergandi. Bunga sabab sobiq rahbarlar va hakamlar qo‘mitasi sobiq vitse-prezidenti Xose Mariya Enrikes Negreyra o‘rtasida korrupsiyaviy holat aniqlangan. 

“Bugungi yig‘ilishda “Real Madrid” direktorlar kengashi Barselona prokuraturasi tomonidan “Barselona” sobiq rahbarlariga nisbatan qo‘yilgan ayblovlarni ko‘rib chiqdi. 

“Real” faktlarning jiddiyligidan xavotirda ekanligini bildirmoqchi va huquqiy tizimga ishonchini yana bir bor ta’kidlaydi. Klub o‘zining qonuniy huquqlarini himoya qilgan holda sudda ishtirok etishga rozi bo‘ladi”, — deyiladi bayonotda. 

Barca Universal nashrining xabariga ko‘ra, “Barselona” madridliklarning ushbu bayonotidan hayratda qolgan. Bayonotdan so‘ng klublar o‘rtasidagi munosabatlar yomonlashishi mumkin.