Jenna Ortega “Uenzdey” serialida ssenariy mualliflarining talablarini bajarishdan bosh tortgani va qahramonining so‘zlarini o‘zgartirgani haqida gapirib berdi

Jenna Ortega nafaqat Netflix’ning Addamslar oilasi haqidagi serialida bosh rol — Uenzdeyni ijro etdi, balki suratga olish jarayonlarida o‘z qahramonining obrazi va xarakteriga o‘zgartirishlar kiritdi, deb xabar bermoqda “Pravila jizni” nashri.

Aktrisa Deks Shepard va Monika Padmanning Armchair expert podkastida “Uenzdey” serialidagi obrazining  xarakterini yanada haqiqiyroq qilish uchun ba’zi hollarda ssenariyga o‘zgartirish kiritib, ish tutgani haqida so‘zlab berdi.

Uning so‘zlariga ko‘ra, ssenariy mualliflarining qator talablari obrazning xarakteriga umuman ma’no bermagan.

Sevgi uchburchagida bo‘lish u uchun hech qanday ma’noga ega emasdi. U maktabdagi raqsi uchun kiygan libosi haqida ham mana bunday deyishi kerak edi: “O xudoyim, naqadar ajoyib! Bunday deganimga ishonolmayman. O‘zimdan nafratlanaman”. Men esa bu so‘zlarni aytmasligimni e’lon qilganman, — deydi aktrisa.

“Suratga olish jarayonlarida o‘zimni professional darajada his etmagan paytlarim bo‘ldi, shuning uchun qahramonimning so‘zlarini o‘zgartira boshladim”, — deya qo‘shimcha qildi Ortega.

Bundan tashqari, aktrisa serialdagi raqs sahnasini tubdan o‘zgartirdi, keyinchalik raqs tomoshabinlar orasida juda mashhur bo‘ldi. Ortega suratga olish jarayonlaridan bir necha kun oldin xoreografiya mashg‘ulotlari bilan shug‘ullangan va serial chiqqandan keyin Uenzdeyning raqsi ijtimoiy tarmoqlarda trendga aylandi. Millionlab ijtimoiy tarmoq foydalanuvchilari Orteganing harakatlarini takrorlaydigan videolarni o‘z sahifasiga joylashtirdi.

“Bu dastlab fleshmob edi. U raqsga tushishi va hamma uni takrorlab, u bilan raqsga tushishi kerak edi. Men rad etdim, chunki... nega u bunga rozi bo‘lishi kerak edi?”, — deydi Jenna.

Aktrisaning ta’kidlashicha, u ssenariy mualliflari bilan alohida gaplashib, nima uchun qahramonining so‘zlarni o‘zgartirayotganini tushuntirishga majbur bo‘lgan.

Ortega shu tarzda “Uenzdey” serialidagi qahramonini “himoya qilganini” aytdi. “Uenzdey” seriali 2022-yilda eng ko‘p tomosha qilingan serialga aylandi. Shuningdek, serial namoyish etilgandan bir hafta o‘tib, Netflix’da eng ko‘p tomosha qilingan ingliz tilidagi loyihaga aylandi. Tomoshabinlar birinchi qismni ko‘rish uchun 341 million soatdan ortiq vaqt sarfladi.