Andijon viloyatining Jalaquduq tumanida yashovchi 23 yoshli kelin adirlik hududida o‘ziga benzin quyib, yoqib yubordi. Bu haqda “Daryo” muxbiri xabar berdi.
“Daryo” holatga aniqlik kiritish maqsadida Bosh prokuratura axborot xizmati bilan bog‘landi.
Maʼlum qilinishicha, 6-mart kuni Jalaquduq tumani, Janubiy Olamushuk shaharchasida yashovchi, 23 yoshli R.A. shahar o‘ramida joylashgan adirlik hududida o‘ziga benzin quyib, yoqib yuborishi orqali vafot etgan.
Suiqasd sababini aniqlash yuzasidan sud-tibbiy ekspertiza tayinlanib, qaror ijroga yuborilgan. Mazkur holat yuzasidan Jalaquduq tuman prokuraturasi tomonidan tergovga qadar tekshiruv harakatlari olib borilmoqda.
Qo‘shimcha qilinishicha, holatga guvoh bo‘lganlar marhumaga yordam ko‘rsatish maqsadida tuman shoshilinch tez tibbiy yordam bo‘limiga olib borgan. Tibbiy maʼlumotga ko‘ra, R.A.ning badani alangadan 100 foiz kuygan. Shifokorlar tomonidan ko‘rsatilgan tez-tibbiy muolajalarga qaramasdan u 7-mart kuni shifoxonaning jonlantirish bo‘limida vafot etgan.
Holat yuzasidan Jinoyat kodeksining 103-moddasi (o‘zini o‘zi o‘ldirish darajasiga yetkazish) bilan jinoyat ishi qo‘zg‘atilgan.
Izoh (0)