O‘zbekistonda dizayni bo‘yicha yagona deyilgan Andijondagi kutubxona elektrdan qarzdorligi sabab faoliyatini to‘xtatgani aytilmoqda

Ijtimoiy tarmoqlarda Andijon viloyatining Marhamat tumanida O‘zbekistonda dizayni bo‘yicha yagona ekani aytilgan, tadbirkor tomonidan qurilib, aholi foydalanishi uchun tekinga berilgan zamonaviy kutubxona elektr energiyadan qarzdorligi sabab faoliyat ko‘rsatmayotgani xabar qilindi. Xususan, Facebook faoli Isroil Tillaboyev shaxsiy sahifasida bu haqda bir o‘qituvchi yozganini aytib, bundan xafa bo‘lganini bildirdi.

“Daryo” muxbiri holat haqida kengroq maʼlumot olish maqsadida Marhamat tumanida bo‘lib, tadbirkor vakili hamda mutasaddilar bilan uchrashib, jamoatchilikning savollariga javob izladi.

Tadbirkorning ish boshqaruvchisi Jasurbek Ro‘zimatovning aytishicha, kutubxona 60 ming nusxa bosma hamda 300 mingga yaqin elektron kitob fondiga ega bo‘lib, 2021-yil iyul oyida foydalanishga topshirilgan. Joriy yilgi anomal sovuq tufayli kutubxona va shaxmat maktabi binolarining tom qismida yoriqlar paydo bo‘lishi natijasida yuz bergan yog‘ingarchiliklar oqibatida elektr tarmoqlariga zarar yetgan. Shu sababli kutubxona faoliyati vaqtincha to‘xtatilib, axborot resurs markazi boshqa yerga ko‘chirilgan.

“Kutubxonamiz 2021-yil iyul oyida foydalanishga topshirilgan. Ushbu davrdan beri, yaʼni avgust oyidan davlat kutubxonasi xodimlari bilan birgalikda ishlab kelinmoqda. 10-15 kun oldingi anomal sovuqlar tufayli tom qismimizda yoriqlar paydo bo‘ldi. Undan so‘ng yog‘ingarchilik ko‘p bo‘lgani sababli o‘sha yoriqlardan suvlar sizib o‘tgan. Tabiiyki, buning elektr energiyamizga taʼsiri bo‘ldi. Yuqori qismda joylashgan elektr tarmoqlarimizga yog‘ingarchilik natijasida suv o‘tib, qisqa tutashuvlar bo‘ldi. Shuning hisobiga ikki-uch kun elektr montajlarini olib borish maqsadida ish jarayonida toklarimizni o‘chirib qo‘ydik. Ishlarimizni amalga oshirib, muammoni bartaraf etdik. Lekin hozirgi vaqtda tom qismimizda bajarilishi kerak bo‘lgan ishlar ko‘lami katta bo‘lgani sababli, qolaversa, shu holat yana qaytarilmasligi uchun 15-20 kun ichida ustalarimiz o‘zlari kelib, o‘sha ishlarni tugatib, yakuniga yetkazib beradi. Ish birinchi galda kutubxona tomidan boshlanadi.

Biz hokimlikka hech qachon kommunal to‘lovlarni yuklamaganmiz, yuklamaymiz ham. Har qanday to‘lovni tadbirkorning o‘zi amalga oshirib kelyapti. Hozirgi kunda qarzdorligimiz yo‘q. Bo‘lsa ham, u kutubxonaning yopilishiga asos bo‘lolmaydi. Chunki har qanday kommunal to‘lovlarni o‘zimiz qilib kelganmiz va bundan keyin ham o‘zimiz amalga oshiramiz. Xudo xohlasa, Muhammad Yusufning tug‘ilgan kuniga boshqa viloyatlardan tashriflarni kutyapmiz. Tadbirlarni kengroq nishonlash uchun ham tayyorgarlikni boshladik”, — deydi Jasurbek Ro‘zimatov.

Respublika Maʼnaviyat va maʼrifat markazi Marhamat tuman bo‘linmasi mutaxassisi Ergashoy Malikova kutubxona bilan doimiy hamkorlik qilinganini aytmoqda.

“Tumandagi ‘Kelajak nuri’ kutubxonasi bilan doimo hamkorlikda ishlaganmiz, tadbirlar o‘tkazganmiz. Kitobxonlarni kutubxonaga jalb qilganmiz. Binoda vaqtincha taʼmirlash ishlari olib borilayotgani uchun hozir bu narsalar to‘xtab turibdi. Ishlar tugaganidan keyin yana davom ettiramiz. Ikki kun oldin binoning tom qismida qurilish ishlari bo‘layotgandi. Faqat bitta narsa bor, kutubxonada hech qanday deraza yo‘q. O‘tgan yili issiqda kitobxonlar shu sabab qiynaldi. Hatto kirib ishlashning imkoni bo‘lmagan. Bu yerdagi xodimlar ham yaxshi bilishadi. Qulaylik yaratish uchun ham ta’mirlash ishlari olib borilyapti. Tadbirkor bilan tuman hokimi suhbatlashganda 1-aprelga qadar taʼmirlash ishlarini tugatib, yana qayta foydalanishga topshirilishi bildirilgan”, — deydi Ergashoy Malikova.

Marhamat tumani axborot-resurs markazi direktori Zulfiya Davlatovaning aytishicha, bu kutubxona bir yarim yil davomida faoliyat yuritgan. Ikki hafta avval vaqtinchalik tuman Fuqarolik holati dalolatnomalarini yozish bo‘limi binosiga ko‘chib o‘tishgan.

“Bizning axborot resurs markazimiz jami 20 mingdan ortiq kitob fondiga ega. Avval eski binoda, keyinchalik 2020-yildan joriy yilning fevral oyiga qadar tadbirkorimiz Qobiljon Obidov tomonidan qurilgan binoga ko‘chib, ish faoliyatimizni olib bordik. Bu yerda sharoitlar yaxshi bo‘lgani uchun tuman aholisiga yaxshi xizmat ko‘rsatdik. Bu yerda qanchadan qancha tadbirlar bo‘lib o‘tdi. Kutubxonada taʼmirlash ishlari boshlangani tufayli tuman FHDY binosiga ko‘chib o‘tdik. Hozirda aholiga shu yerdan xizmat ko‘rsatishni boshladik. Taʼmirlash binoning ichkarisida bo‘lgani sababli kitoblarga zarar yetmasin deb ko‘chdik. Faoliyatimiz to‘xtab qolsa bo‘lmasdi. Sababi dasturimiz bor, shunga kitoblarni tushirib borishimiz kerak. U yerda internetda uzilish bo‘lgani sababli bu yerga vaqtinchalik ko‘chib o‘tdik”, — deydi Zulfiya Davlatova.

Markaz direktorining taʼkidlashicha, kutubxonadagi oylik to‘lash bilan bog‘liq masalalardan tashqari boshqa barcha masalalar, yaʼni kommunal to‘lovlar tadbirkor tomonidan qoplanadi.

“U yerga faqat faoliyat olib borish uchun borganmiz. Elektr energiya masalalari hokimlik va tadbirkor hamkorligida hal bo‘ladigan masalalar edi. Kommunal to‘lovlar bo‘yicha shu kunga qadar bizga hech qanday eʼtirozlar bo‘lmagan. Hamma narsani tadbirkor bilan hokimiyat kelishgan. Biz moliyaviy masalalarga aralashmaganmiz”, — deydi Zulfiya Davlatova.

“Daryo” muxbiri o‘rganishi davomida ish boshqaruvchi, ARM rahbari hamda hokimlik vakiliga jamoatchilikni qiziqtirgan boshqa savollarni ham berdi va javob olishga harakat qildi. Biroq masʼullar bu savollarga javob bermadi. Hokimlik tadbirkor bergan kutubxonani o‘z balansiga olishni kechiktirmoqda. Savollar ko‘p, javoblar esa yetarli emas.

“Daryo” voqealar rivojini kuzatishda davom etadi.