Boks. Elnur Abduraimov meksikalik sportchiga qarshi jangda muddatidan avval mag‘lub bo‘ldi

Boks bo‘yicha Meksikada Zanfer Boxing kompaniyasi tomonidan tashkil etilgan musobaqa 6-mart tongida bo‘lib o‘tdi.

Unda Super yarim o‘rta vaznda (58,9 kg) faoliyat olib borayotgan o‘zbekistonlik bokschi Elnur Abduraimov mezbon, shu vaqtga qadar mag‘lubiyatga uchramagan Daniyel Garsiya Molinaga qarshi ringga ko‘tarildi.  
 
10 raundga mo‘ljallangan jangning 7-raundidan so‘ng Abduraimovning burchagi jangni davom ettira olmasligini ma’lum qildi va Garsiya Molina texnik nokaut evaziga g‘alaba qozonib, IBF Shimoliy Amerika kamarini o‘ziniki qilish bilan birga, o‘z statistikasini 15-0 (12 nokaut) ko‘rinishiga keltirdi. Elnur Abduraimovning rekordi esa 10-1 (9 nokaut) ko‘rinishga keldi.

Ma’lum bo‘lishicha 4-raundga kelib Elnurning chap qo‘li jarohat olgan. 7-raundda esa jarohat jiddiylashgach, uning jamoasi jangni davom ettirmaslikni lozim topgan.