O‘zbekiston U-20 terma jamoasi bosh murabbiyi Ravshan Haydarov Osiyo Kubogi—2023 2-turi doirasida kechgan Iroqqa qarshi o‘yindan (1:0) keyin o‘z fikrlari bilan o‘rtoqlashdi.
O‘yin haqida
Ushbu o‘yin ikkala jamoa uchun ham muhim bo‘lganligi sababli dastlabki daqiqalaridan qizg‘in o‘tdi. Qizil kartochka tufayli o‘yin uslubimiz o‘zgardi. Shunday bo‘lsa-da yigitlar mas’uliyat bilan harakat qilib, g‘alaba uchun oxirigacha kurashdi.
Abdurazzoqovning almashtirilishi haqida
U hech qanday jarohat olgani yo‘q, Nodir o‘yinga moslashishga biroz qiynaldi. Ayrim vaziyatlarda xatolarga yo‘l qo‘ydi. Shu sababli biz uni almashtirishga qaror qildik.
Qizil kartochkadan keyingi o‘yin
Bir kishi kam bo‘lib qolganimizdan so‘ng qarshi hujumda o‘ynashga o‘tdik. Iroq ham ajoyib o‘yin ko‘rsatdi. Ular yakkakurashlarda yaxshi o‘ynadi. 10 kishi qolgan holda ham 2-3 ta vaziyatlar yarata oldik, biroq ulardan foydalanolmadik. Darvozabonimiz esa bugun ajoyib o‘yin namoyish etdi. Qizil kartochkaga kelsak, bu vaziyatni o‘zimiz qayta ko‘rib, tahlil qilamiz.
Chorak finalda tushish ehtimoli bo‘lgan raqiblar haqida
Biz bugun muhim 3 ochkoni qo‘lga kiritdik, “B” guruhida ham qiziqarli kurashlar bo‘lmoqda. O‘rganishga kelsak, albatta o‘rganib bormoqdamiz.
Indoneziya bilan o‘yin haqida
Farg‘onada bo‘ladigan o‘yin ham muhim hisoblanadi. Chunki barcha jamoalarda hali imkoniyat bor, ular g‘alaba uchun maydonga chiqadi.
Bugun biz katta kuch sarfladik. Futbolchilar emotsional jihatdan ham toliqdilar. Shifokorlarimiz tiklanish ustida ishlashadi. Umuman olganda, keyingi uchrashuvga ham reja asosida tayyorgarlik olib boramiz.
Izoh (0)