Farg‘onada fuqaro qurilishi tugallanmagan futbol maydonini noqonuniy tarzda 150 ming dollarga sotmoqchi bo‘ldi

Farg‘ona shahrida qurilish va obodonlashtirish uchun ajratilgan yer maydonining noqonuniy sotilishining oldi olindi, deb xabar bermoqda Bosh prokuratura huzuridagi departament.

Ma’lum bo‘lishicha, Sh.X. o‘ziga qurilish va obodonlashtirish ishlarini amalga oshirish maqsadida ajratilgan qurilishi tugallanmagan futbol maydoni bino-inshootini oldi-sotdi qilish uchun Davlat kadastrlari palatasining viloyat boshqarmasiga soxta hujjatlarni taqdim qilib, qurilishi tugallanmagan bino-inshootga mulk huquqini davlat ro‘yxatidan o‘tkazishga erishgan.

Keyinchalik ushbu qurilishi tugallanmagan yer maydonini fuqaro X.Ya.ga sotish huquqi yo‘qligini bildirmasdan, uni aldab, ushbu obyektning bir qismini 150 ming dollarga sotishga kelishib, shundan 105 ming dollarini firibgarlik yo‘li bilan qo‘lga kiritgan.

Mazkur holat yuzasidan Jinoyat kodeksining 168-moddasi (firibgarlik) va 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan jinoyat ishi qo‘zg‘atilib, tergov harakatlari o‘tkazilmoqda.