Surxondaryoda zilzila bo‘lishi haqidagi xabarlar rad etildi

Surxondaryo viloyatida yer qimirlashi sodir bo‘lishi haqida xabarlar tarqaldi. Viloyat hokimligi axborot xizmati mazkur xabarlarni rad etdi.

Hokimlik e’lon qilgan bayonotga ko‘ra, voha aholisi o‘rtasida ayrim tasdiqlanmagan va yolg‘on axborotlar sababli yer qimirlashi, zilzila sodir bo‘lishi haqida xabarlar tarqalgan. Mazkur xabarlar mutlaqo asossiz va yolg‘on ekani ta’kidlangan. 

Hurmatli fuqarolarimizdan hech qanday vahimaga berilmasliklarini so‘ragan holda, viloyat hududida seysmik hodisalar, yer qimirlashi yoki zilzila sodir bo‘lishi haqida tarqalgan xabarlar mutlaqo asossiz va yolg‘on xabar ekanini ma’lum qilamiz, — deyiladi xabarda.

Shuningdek, turli g‘araz niyatlarda aholi o‘rtasida yolg‘on xabar tarqatayotganlarga qonunchilikda bunday holatlarni sodir etganlarga nisbatan javobgarlik belgilangani eslatib o‘tilgan.