AQSH davlat kotibi Entoni Blinken 28-fevraldan 3-martgacha O‘zbekiston, Qozog‘iston va Hindistonga tashrif buyuradi. Bu haqda AQSH Davlat departamenti matbuot xizmati xabar berdi.
Qayd etilishicha, u o‘z safarini Ostonadan boshlab, mintaqadagi beshta davlat vakillari ishtirok etadigan “C5+1” formatidagi (Markaziy Osiyov + AQSH) uchrashuvda ishtirok etadi va “AQSHning Markaziy Osiyo davlatlari mustaqilligi, suvereniteti va hududiy yaxlitligiga sodiqligini, shuningdek, umumiy global muammolarga yechim topishda mintaqa bilan hamkorlik qilishni tasdiqlaydi”.
“C5+1” formatidagi vazirlar yig‘ilishida AQSh, Qozog‘iston, Qirg‘iziston, Tojikiston, Turkmaniston va O‘zbekiston o‘rtasidagi iqtisodiy, energetika, atrof-muhit va xavfsizlik sohasidagi hamkorlikni mustahkamlash masalalari muhokama qilinadi.
Shundan keyin Blinken Toshkentga kelib, mamlakat rasmiylari bilan “ikki tomonlama va mintaqaviy masalalar bo‘yicha hamkorligimizni yanada rivojlantirish” borasida muzokaralar o‘tkazadi. Bu AQSh davlat kotibining O‘zbekistonga birinchi tashrifi hisoblanadi.
1-mart kuni esa u Nyu-Deliga borib, G20 ga a’zo davlatlarning tashqi ishlar vazirlarini oziq-ovqat va energetika xavfsizligi, barqaror rivojlanish, giyohvandlikka qarshi kurash, global sog‘liqni saqlash, gumanitar yordam va tabiiy ofatlar oqibatlarini bartaraf etish, gender tengligi va ayollar huquqlarini kengaytirish sohalarida hamkorlikni mustahkamlash masalalariga bag‘ishlangan yig‘ilishda qatnashadi.
Avvalroq Entoni Blinken O‘zbekistonda amalga oshirilayotgan islohotlarni ijobiy baholab, Amerika tomoni ularni amalga oshirish jarayonida har tomonlama yordam berishga tayyorligini bildirgandi. AQSH davlat departamenti rahbari respublikaning inson huquqlarini himoya qilish, shu jumladan, diniy erkinliklarni ta’minlash, odam savdosiga qarshi kurashish va majburiy mehnatga barham berish borasida erishgan yutuqlarini alohida ta’kidlagan.
Izoh (0)