Amerika investitsion fondi “Inter”ni sotib olishi mumkin

Italiyaning “Inter” jamoasi Amerika fondi qo‘l ostiga o‘tishi mumkin.

Il Giornale nashrining xabariga ko‘ra, Goldman Sachs and Raine Group investitsion banklari har oyda 10 million yevro zarar ko‘rayotgan Milan klubini boshqarishda Suning Holdings Group’ga yordam berish uchun uzoq vaqtdan buyon xaridor yoki hech bo‘lmaganda hamkor qidirmoqda. 

Klub yoki uning bir qismini sotish bilan bog‘liq vaziyat ikki hafta ichida hal bo‘lishi mumkin, chunki Amerika sarmoya fondi biznesga kirishga tayyor, deya ta’kidlanmoqda. Agar dastlabki muzokaralar muvaffaqiyatli yakunlansa, kelishuv yozda rasmiylashtiriladi. 

“Inter” xo‘jayini Stiven Chjan dastlab klubni 1 milliard yevroga baholagandi, biroq RedBird Capital Partners “Milan”ni xarid qilganidan so‘ng narxni 1,2 milliardga oshirgan edi. 

Jamoa narxi pasayishi mumkin. Chunki bu bir tomondan “Inter”ga nisbatan talabga ta’sir qiladi, ikkinchidan, Gongkongdagi Xitoy banki “nerazzuri” rahbarini 300 million qarz bo‘yicha sudga bergan. Bu jarayon Milan klubini sotish ishlari tezlashishiga sabab bo‘lishi mumkin. 

“Inter” 2016-yildan buyon Suning Holdings Group kompaniyasiga tegishli hisoblanadi.