Qoraqalpog‘istonda xizmat ko‘rsatgan artist, xonanda Janob Rasul 14-fevral kuni poytaxtdagi mehmonxonalarning birida “Pervaya lyubov” nomli qo‘shig‘ining taqdimot marosimini o‘tkazdi. Taqdimotga xonandaning do‘stlari va shou-biznes vakillari tashrif buyurdi. Xonandaning taklifiga ko‘ra, “Daryo” muxbirlari ham taqdimotda ishtirok etib, qiziqarli reportaj tayyorladi.
Premyeraning boshida xonanda Janob Rasul so‘zga chiqib premyerani umuman boshqacha o‘tkazishni rejalashtirganini, biroq Turkiyadagi zilzila sabab uning umuman boshqacha o‘tkazilishi haqida gapirib berdi. Xonanda Turkiyadagi zilzila jabrdiydalariga yordam bermoqchi ekanini ta’kidlab to‘rt kunda tayyor bo‘lgan, zilzila talafotlari aks etgan videoroligini va qo‘shig‘ini muxlislariga taqdim etdi.
“Yangi klipga 300 million so‘mga yaqin mablag‘ ketdi. Premyerani to‘xtatishimning sababi zilzila voqealaridan keyin hech birimizning ichimizga bu narsa sig‘mayapti. Biz ham turkiy millatmiz. U yerda qancha yosh bolalar halok bo‘ldi, hamma yig‘layotgan paytda biz bu narsani taqdim etishga botinmadik. Ko‘nglimizga sig‘madi, shuning uchun qo‘limizdan kelgancha hamdardlik bildirishni, yordam berishni niyat qildik.
“Shou-biznes vakillarini chaqirganimning sababi ularning ijtimoiy tarmoqdagi obunachilari, muxlislari ko‘p. Ulardan yaxshilik yo‘lida foydalanishga qaror qildim. Videoni ijtimoiy tarmoqlardagi sahifalariga qo‘yib berishsa, buni ko‘pchilik ko‘radi, ulardan tushgan mablag‘ni Turkiyadagi zilziladan jabr ko‘rgan insonlarga beramiz.
“Klipda baliq zo‘r rol o‘ynadi. Baliq suvsiz qiynalib yotishi kerak edi, lekin o‘lgan baliq rolini yaxshi o‘ynab berdi, qimirlamasdan yotdi”, — deydi xonanda.
Zilzilaga bag‘ishlangan videorolikdan so‘ng xonanda va’da qilganidek yangi klipini premyera ishtirokchilariga taqdim etdi, biroq “Pervaya lyubov” taronasiga ishlangan klip ma’lum bir muddatdan keyin Youtube’ga qo‘yilishini aytdi.
Shundan so‘ng xonanda premyeraga tashrif buyurgan ishtirokchilar, shou-biznes vakillarining ikkita klip haqidagi fikriga qiziqdi.
O‘zbek shou-biznes vakillarining bir qator vakillari: instablogerlar: Dili.me, Bobur Mansurov, “Dizayn” kulgi jamoasi a’zolari Sa’dulla Fatxullayev, Dilshodbek Musabekov, shuningdek, aktrisa Feruza Normatova, aktyorlar Dilshodbek Kattabekov, Azamat Ahrorov kliplar haqida fikr bildirib, xonandaning keyingi ijodiga omad tiladi.
“Janob Rasul bilan birinchi marta ishlashimiz, yangi klipda tasvirchi sifatida ishtirok etdim. Klip rejissori Azamat bo‘ldi. Janob Rasul bilan qiyinchilikka duch kelmadim, kamera oldida o‘zini tutishi yaxshi. U rejissor talab qilgandan ham ko‘proq narsani qilib berdi. Kelajakda yana u bilan birga ishlash niyatimiz bor.
Klipdagi aktyor, aktrisa masalasiga keladigan bo‘lsak, rollarni boshqa aktyorlar ijro etishi kerak edi. Klipdagi aktyorlar professional emas, qiynalgan narsamiz ularni ssenariyga moslashtirishga harakat qildik”, — deydi Yodgor Nosirov.
“Yoshligimizdan Janob Rasulning qo‘shiqlarini eshitamiz. Hamma qo‘shiqlari xit bo‘ladi, bu kliplarida ham yondashuv boshqacha, xit bo‘ladi degan umiddamiz”, — deydi instabloger Bobur Mansurov.
“Ashula yaratilayotgan vaqtda klip voqealari xayolimga keldi. Bastakor bilan birga qo‘shiqni yaratganmiz. Klip suratga olish jarayonlari Turkiyada bo‘lib o‘tdi. Kelib premyerani e’lon qildi, undan keyin zilzila bo‘ldi. Bu narsa Allohning qudrati. Keyin Rasul aka klip premyerasini bekor qilamiz dedi”, — deydi klip prodyusser Azamat Taganov.
“Men hech qaysi san’atkorni qo‘shiqlarini so‘zlari bilan eslab qola olmayman. Lekin o’sha vaqtda eshitganimda maza qilib tinglayman. Janob Rasulni judayam energiyaga boy inson sifatida bilaman. Aynan erkak xonandalarni ichida qo‘shiqlarida qanaqadir boshqacha bir shijoat bor, boshqacha xarakter bilan aytadi va bittada shu radioda qo’yiladimi yoki boshqa joydan chiqib qoladimi, telefondanmi Youtube’danmi darrov insonni o‘ziga jalb qilib oladigan, shunaqa e’tiborni tortib oladigan qo‘shiqlarni ijro qiladi”, — deydi aktrisa Feruza Normatova.
“ Pervaya lyubov’ning ustida bir yarim oy ishladik. Yaxshi klip bo‘ldi deb o‘ylayman. Azamat akam bilan birga uxlamasdan mehnat qildik. Bundan keyin ham yaxshi narsalarni taqdim etishga harakat qilamiz”, — deydi yangi klip ustida ishlagan ijodkor Timur Shamsutdinov.
Premyera so‘ngida xonanda barcha ishtirokchilarga minnatdorlik bildirib, ma’lum bir muddatdan keyin “Pervaya lyubov” klipini muxlislariga taqdim etishini va Turkiyadagi zilzila voqealarini o‘z ichiga oluvchi videoklipni tarqatishda faollik ko‘rsatishni so‘radi.
Quyida videoni to‘liq tomosha qilishingiz mumkin.
Izoh (0)