Qozog‘istonda 9-sinf o‘quvchisi bolta va pichoq bilan o‘quvchilarga hujum qildi

Qozog‘istonning Petropavlovsk shahridagi 4-maktabda oshxona pichog‘i va bolta bilan qurollangan 9-sinf o‘quvchisi uch nafar o‘quvchini yaraladi. Ulardan ikki nafari boshi va bilak qismiga tig‘ sanchib yetkazilgan jarohatlar bilan shifoxonaga yotqizildi. Bu haqda Shimoliy Qozog‘iston viloyati ta’lim boshqarmasi ma’lum qildi.

Voqea darslar boshlanishidan oldin sodir bo‘lgan. Qurbonlar – ikki o‘g‘il va bir qiz 9—10-sinf o‘quvchilari. Ular kasalxonaga yotqizilgan, hushida, ahvoli barqaror, deydi viloyat ta’lim boshqarmasi boshlig‘i Nazir Jashibekov. Uning tushuntirishicha, maktabga kiraverishda bolalar tintuv qilinmagan. “O‘quvchilarning sumkalari tekshirilmaydi. Hujumchi hojatxonaga kirib, pichoq va bolta bilan chiqdi. Boshqa maʼlumotlar oshkor qilinmayapti”, — dedi Jashibekov.

Hujum qilgan bola qo‘lga olindi, odam o‘ldirishga urinish moddasi bo‘yicha sudga qadar tergov harakatlari olib borilmoqda. Dastlabki maʼlumotlarga ko‘ra, u psixiatr nazoratida bo‘lib kelgan, deb xabar qildi viloyat prokuraturasi matbuot xizmati. Maktab maʼmuriyatining harakatlariga ham huquqiy baho beriladi, deya qo‘shimcha qildi ular.