UFC yengil vazn toifasi bo‘yicha chempion Islom Maxachev (24-1) keyingi jangini 2023-yil kuzida BAAda o‘tkazishi mumkin. Bu haqida Islomning vakili TASSga ma’lum qildi.
12-fevral tongida Maxachev UFC 284 musobaqasi doirasida yarim yengil divizion chempioni Aleksandr Volkanovskini (25-2) mag‘lub etib, kamarini himoya qildi.
“Katta jang yakunlandi. Endi Islom dam oladi, undan so‘ng Ramazon oyi. Ko‘p narsa yengil vazn toifasidagi vaziyatga bog‘liq. Biroq keyingi jang kuzda Abu-Dabida bo‘lish ehtimoli bor”, — deydi Maxachevning vakili.
Maxachev BAAda uch marta jang o‘tkazgan: 2019-yil kuzida u Davi Ramosni mag‘lub etgan, 2021-yilda Den Huker, bir yildan so‘ng Charlz Oliveyra ustidan g‘alaba qozongan. Shuningdek, Islom 2020-yilda ham arab diyorida UFC doirasida jang qilishi kerak edi, lekin uning Rafael dos Anyosga qarshi jangi braziliyalik sportchi koronavirusga chalingani tufayli bekor bo‘lgandi.
Izoh (0)