Turkiyadagi zilzila oqibatida halok bo‘lgan namanganlik ikki ayolning jasadi O‘zbekistonga olib kelindi. “Daryo” muxbiri Azizbek Abduvaliyev marhumalardan birining dafn marosimida ishtirok etdi.
“Zilzila payti qaramog‘idagilarni tashlab ketmagan”
Chortoq tumanining “Nurafshon” mahallasida istiqomat qilgan Mashhura Nurmatova 2023-yilning 14-yanvar kuni Turkiyaga ketgan va u yerda keksa er-xotinning uyida xizmatchi bo‘lib ishlagan. 6-fevral kuni u bilan aloqa uzilgan. Uni o‘sha yerda tanigan-bilgan o‘zbekistonlik ayollar Mashhura Qahramonmarashdagi zilzila oqibatida halok bo‘lgani haqida yaqinlariga xabar bergan.
Shundan so‘ng uning ukasi Nizomjon Turkiyaga otlangan va 11-fevral kuni opasining jasadini Istanbul—Farg‘ona aviareysi bilan O‘zbekistonga olib kelgan. Bugun, 12-fevral kuni marhuma Chortoqdagi mahalliy qabristonda dafn etildi.
Yaqinlarining aytishicha, marhumaning jasadi 4 qavatli bino vayronlari ostidan, o‘zi ishlayotgan uydagi er-xotin jasadi bilan yonma-yon topilgan. Bu uning zilzila payti qaramog‘idagilarni tashlab ketmagani, falokatdan qutqarishga harakat qilganidan dalolat beradi.
Qirq yoshni qarshilagan Mashhura Nurmatova turmush o‘rtog‘ining vafotidan so‘ng 13 va 14 yoshdagi ikki qizini tarbiyalab kelayotgandi. Uning dafn marosimida Namangan viloyati hokimining o‘rinbosari Dinara Yoqubova, Chortoq tumani hokimi Anvar Otaxo‘jayev ishtirok etdi. Ular marhumaning yaqinlariga hamdardlik izhor etib, bu oilaga ko‘mak berishga tayyor ekanliklarini bildirdi.
“Falokatdan sog‘-omon chiqqandi”
Norin tumanidagi “Boyovul” mahallasida istiqomat qilgan 45 yashar Barchinoy Mirzayeva 2022-yil noyabrida Turkiyaga yo‘l olgan va Shonliurfa shahrida keksa ayolga qarov bilan mashg‘ul bo‘lgan. Yaqinlarining bildirishicha, u 6-fevral kuni ro‘y bergan zilziladan sog‘-omon chiqqan, biroq o‘zi ishlayotgan xonadon vakillari bilan mashinada ketayotgan payt zilziladan qulayotgan uylarni ko‘rib yuragi dosh bermagan va shu yerdagi kasalxonada vafot etgan. Uning avvaldan yuragi zaif bo‘lgani aytilmoqda.
Barchinoy Mirzayeva ham 18 yashar talaba qizini yolg‘iz voyaga yetkazayotgan edi. Marhumaning dafn marosimi ertaga, 13-fevral kuni o‘zi tug‘ilib-o‘sgan mahallada bo‘lib o‘tishi ko‘zda tutilgan.
“Ortda qolgan farzandlar uchun biz ham masʼulmiz”
Viloyat hokimi o‘rinbosari Dinara Yoqubovaning “Daryo”ga maʼlum qilishicha, bugungi kunda 4,5 mingdan ortiq namanganlik ayol turli sabablar bilan chet davlatlarda bo‘lib turibdi. Ular ish, o‘qish, davolanish va oilaviy sharoit tufayli xorijga chiqib ketgan bo‘lib, 2022-yilning o‘zida 2132 nafar ayol uyga qaytib kelgan.
“Ularga imkon qadar ish topib berishga harakat qilyapmiz. Viloyatda kichik biznes va tadbirkorlikning rivojlangani, sanoat zonalari barqaror faoliyat olib borayotgani, ayollarimizning aksariyati uy sharoitida ham hunar bilan shug‘ullanishga uquvli ekanligi bu borada bizga qo‘l kelmoqda. Joriy yilning o‘zida 58 mingdan ortiq xotin-qizlarning bandligini taʼminlash belgilangan, ularning salmoqli qismini xorijdan qaytgan ayollar tashkil etadi.
Marhuma ayollarimizning qismati nafaqat ularning oilalari va yaqinlari, balki biz uchun ham chinakam fojia. Chunki ularning ortida guldek farzandlari qoldi. Endi ularning voyaga yetishi, taʼlim-tarbiyasi uchun biz ham birdek masʼulmiz”, — deydi Dinara Yoqubova.
Izoh (0)