Samarqand viloyatida AQSHga noqonuniy yo‘llar bilan yuboruvchi guruhlardan yana o‘ndan ortiq kishi jabrlandi. Bu haqda O‘zA xabar berdi.
Xabarga ko‘ra, M.X. va Sh.Sh. uzoq vaqtdan buyon shu yo‘l orqali katta miqdorda mablag‘larni o‘zlashtirib kelgan. Ular J.X.ning ishonchiga kirib, Yevropa davlatlaridan biriga “Shengen” kirish vizasini rasmiylashtirish va Toshkent–Ispaniya–Meksika–AQSH yo‘nalishi orqali Amerikaga yuborishni va’da qilgan. Shundan so‘ng undan 27 ming dollarni talab qilgan. Ular fuqarodan dastlab 10 ming dollar, Meksikaning AQSH bilan chegarasiga yetib borganidan so‘ng 17 ming dollar berishi zarurligini bildirgan.
Qayd etilishicha, Davlat xavfsizlik xizmati viloyat boshqarmasi va Ichki ishlar boshqarmasi xodimlari hamkorligida amalga oshirilgan tadbir natijasida M.X. hamda Sh.Sh. fuqaro J.X.dan 10 ming AQSH dollarini olayotgan vaqtida ashyoviy dalillar bilan qo‘lga olindi. Tintuv vaqtida ularning noqonuniy harakatlaridan jabrlangan 13 nafar fuqaroning hujjatlari (8 ta xorijga chiqish pasporti, 2 ta biometrik pasport, bir dona ID-karta, 2 ta tug‘ilganlik haqida guvohnoma va bir dona nikoh guvohnomasi), shuningdek, yana bir fuqaro N.R.ni AQSHga yuborish evaziga 22 500 dollari miqdoridagi pul mablag‘larini olgani to‘g‘risida tilxat topilib, prosessual tarzda rasmiylashtirildi.
Ma’lum qilinishicha, ushbu shaxslarga nisbatan Jinoyat kodeksining tegishli moddalari bilan jinoyat ishi qo‘zg‘atilib, tergov harakatlari olib borilmoqda.
Eslatib o'tamiz, avvalroq Samarqand viloyatida fuqarolarni Meksika orqali AQSHga joʻnatmoqchi boʻlgan jinoiy guruhning yana bir aʼzosi qoʻlga tushgani xabar qilingandi.
Izoh (0)