Davlat xavfsizlik xizmati Andijon va Sirdaryoda yer maydonlari noqonuniy sotilishining oldini oldi. 

Xabarga ko‘ra, Sirdaryodagi holat Davlat xavfsizlik xizmatining viloyat bo‘yicha boshqarmasi xodimlari tomonidan viloyat ichki ishlar boshqarmasi hamda Iqtisodiy jinoyatlarga qarshi kurashish departamentining hududiy boshqarmasi bilan hamkorlikda o‘tkazilgan tezkor tadbirda aniqlangan. Boyovut tumanidagi mas’uliyati cheklangan jamiyat rahbari mazkur MCHJga qurilish materiallari ishlab chiqarish uchun noturar joy sifatida berilgan 1 gektar yer maydonining 50 sotixini turar joy qurish uchun kadastr tizimidagi tanishlari orqali xaridor nomiga rasmiylashtirib berish evaziga 12 500 AQSH dollari olgan vaqtida ushlandi.

Shuningdek, Andijon viloyatida kuzatilgan holatda esa Ulug‘nor va Baliqchi tumanida yashovchi ikki fuqaro Ulug‘nor tumanidagi fermer xo‘jalik rahbariga go‘yoki mazkur xo‘jalik yer maydonlarida sherikchilik asosida tadbirkorlik bilan shug‘ullanishlarini aytadi. Shundan so‘ng uning ishonchiga kiradi va fermer xo‘jaligiga bog‘dorchilik uchun ajratilgan 4 gektar yer maydonining kadastr hujjatlarini hamda fermer xo‘jalikning rasmiy muhrini qo‘lga kiritadi.

Davlat xavfsizlik xizmatining Andijon viloyati bo‘yicha boshqarmasi, viloyat ichki ishlar boshqarmasi hamda Iqtisodiy jinoyatlarga qarshi kurashish departamentining hududiy boshqarmasi xodimlari hamkorligida o‘tkazilgan tezkor tadbirda mazkur ikki fuqaro ushbu 4 gektar yer maydonini 148 million 200 ming so‘m evaziga xaridor nomiga rasmiylashtirib berishga kelishib, undan so‘ralgan pulni olgan vaqtlarida ushlandi. 

Ma’lum qilinishicha, hozirda mazkur holatlar yuzasidan ushbu shaxslarga nisbatan jinoyat ishlari qo‘zg‘atilgan.