Turkiyada zilzila sabab hukumat tanqid qilinganidan keyin Twitter’ga kirish cheklandi — OAV
Turkiyada prezident Rajab Toyyib Erdo‘g‘on hukumatini minglab odamlarning hayotiga zomin bo‘lgan zilzilalarga sust rasmiy munosabat bildirgani uchun ommaviy tanqid qilishganidan keyin Twitter’ga kirish cheklandi. Bu haqda NetBlocks va BalkanInsight xabar bermoqda.
“Real vaqt rejimidagi tarmoq ma’lumotlari Turkiyada Twitter cheklanganini ko‘rsatmoqda; aholi bir qator halokatli zilzilalardan so‘ng yirik internet-provayderlar xizmatlariga tayanishni boshlaganda, ushbu internet-provayderlar uchun filtrlash qo‘llanilmoqda”, — deya qayd etilgan NetBlocks’ning global tarmoq erkinligini kuzatuvchi Internet-observatoriyasi xabarida.
Turkiya aholisi hozir uchta yirik internet-provayderdan ikkitasi orqali Twitter’ga kira olmaydi. TurkTelekom va Turkcell tarmoqqa kirishni butunlay bloklagan. Vodafone esa hozircha Twitter’ga sekinroq kirish imkonini bermoqda.
OAV xabarlariga ko‘ra, Turkiyadagi dahshatli zilziladan bir necha kun o‘tib ham hukumat bir qancha mintaqalarga zarur yordamni yetkaza olmayapti.
BalkanInsight’ning qo‘shimcha qilishicha, hukumat Twitter’dagi taqiq haqida rasman e’lon qilmagan yoki izoh bermagan. Ammo avval ham hukumat tabiiy ofatlar, teraktlar va norozilik namoyishlaridan keyin ijtimoiy tarmoqlarga kirishni cheklab qo‘ygan edi.
Mutaxassislar, siyosatchilar va aholi bu taqiqni tanqid qilib, Twitter omon qolganlar va qurbonlarni qidirayotgan ko‘plab odamlar, shuningdek, mahalliy va milliy yordam kampaniyalari uchun asosiy aloqa manbai ekanini ta’kidlamoqda.
Eslatib o‘tamiz, 6-fevral kuni ertalab Turkiya va Suriyada kuchli zilzilalar sodir bo‘ldi. So‘nggi ma’lumotlarga ko‘ra, 12 mindan ortiq kishi halok bo‘lgani va 52 mingdan ortig‘i jarohat olgan. Bundan tashqari, olti mingdan ortiq binolar vayron bo‘lgan.
