Toshkentdagi anomal sovuqda talafot ko‘rgan ichki yo‘l va obyektlarni ta’mirlashga 584 mlrd so‘m foizsiz kredit ajratiladi

Anomal sovuqda talafot ko‘rgan Toshkentdagi ichki yo‘llar va obyektlarni ta’mirlash uchun 584 milliard so‘m foizsiz kredit ajratiladi. Bu bo‘yicha Prezidentning tegishli qarori imzolandi.

Qarorga muvofiq, Toshkent shahri mahallalarining infratuzilmasini rivojlantirish, havo harorati keskin sovib ketishi davrida talafot ko‘rgan mahallalardagi ichki yo‘llar, piyodalar yo‘laklari, muhandislik-kommunikatsiya obyektlarini ta’mirlash maqsadida Tiklanish va taraqqiyot jamg‘armasi hisobidan Toshkent shahri mahallalarining infratuzilmasini rivojlantirish, havo harorati keskin sovib ketishi davrida talafot ko‘rgan mahallalardagi ichki yo‘llar, piyodalar yo‘laklari, muhandislik-kommunikatsiya obyektlarini ta’mirlash va obodonlashtirish uchun Toshkent shahar hokimligiga 584 milliard so‘m miqdorida foizsiz kredit ajratiladi.

Mazkur kredit mablag‘larining 200 milliard so‘mi 2023-yilning IV choragida, 384 milliard so‘mi 2024-yilning har choragida teng ulushlarda Toshkent shahar mahalliy budjetining qo‘shimcha manbalari hisobidan Jamg‘armaga qaytariladi.

Qarorga ko‘ra, Toshkent shahar hokimligi ushbu kredit mablag‘lari hisobidan Toshkent shahrining har bir mahallasiga qo‘shimcha 1 milliard so‘mdan mablag‘ ajratadi. Poytaxtning tuman hokimliklari mahallalar raislari bilan birgalikda mahallalarning infratuzilmasini rivojlantirish bo‘yicha amalga oshiriladigan loyihalarning ro‘yxatlarini xalq deputatlari tuman kengashlarida muhokama qilib, tasdiqlaydi.