AQSHning SpaceX kompaniyasi Ukraina harbiylariga Starlink sun’iy yo‘ldosh internetidan dronlarni boshqarishda foydalanishni cheklash choralarini ko‘rdi, chunki xizmat “hech qachon qurol sifatida qo‘llanilmagan”. Bu haqda SpaceX prezidenti va bosh direktori Gvin Shotvell matbuot anjumani chog‘ida ma’lum qildi.
Dronlarni boshqarish uchun internetdan foydalanish SpaceX’ning Ukraina hukumati bilan tuzgan kelishuvi doirasiga kirmaydi, deb tushuntirdi Shotvell. Uning ta’kidlashicha, shartnoma gumanitar maqsadlarni — shifoxonalar, banklar va jangovar harakatlardan jabrlangan ukrainaliklarni keng polosali internet bilan ta’minlashga qaratilgan.
“Bilamizki, harbiylar ularni aloqa uchun ishlatishadi va bu normal holat. Ammo biz hech qachon undan tajovuzkor maqsadlarda foydalanish niyatida bo‘lmaganmiz”, — dedi Shotvell.
Yaqinda Ukrainada Starlink’ning uzilib qolishi kompaniyaning xizmatdan dronlar uchun foydalanishlariga yo‘l qo‘ymaslik harakatlari bilan bog‘liqmi, degan savolga u “buni aniq bilmasligini” va shuning uchun javob berishni istamasligini aytdi. Urush zonasiga uskunani jo‘natayotganda kompaniya undan dronlarni boshqarishda foydalanishni taklif qilmagandi, dedi u boshqa savolga javoban.
SpaceX Ukrainaga Starlink terminallarini Rossiya bosqini boshlanganidan so‘ng yetkazib bera boshladi, ukrainaliklar kompaniya tomonidan quyi Yer orbitasiga chiqarilgan deyarli 4 ming sun’iy yo‘ldosh tarmog‘idan foydalanmoqda.
Ukraina Mudofaa vazirligi yanvar oyi oxirida dron va Starlink terminallari bilan jihozlanishi rejalashtirilgan “dunyodagi birinchi dronli zarba rotalari” yaratilayotgani haqida e’lon qilgandi.
Izoh (0)