O‘zbekistonda qurilishi yakunlangan obyektlarda barcha norma va talablar toʻliq bajarilgani hamda ish sifatli amalga oshirilgani tasdiqlangandan soʻng, foydalanishga ruxsat beriladi. Bu haqda Qurilish va uy-joy kommunal xoʻjaligi vazirligi axborot xizmati rahbari Saidnosir Usmonov 9-fevral kuni bo‘lib o‘tgan brifingda aytib o‘tdi.
Saidnosir Usmonov Turkiyada yuz bergan zilziladan so‘ng O‘zbekistonda qurilish sifati qandayligi, bino va inshootlarning zilzilabardoshligi qay darajada talabga javob berishi odamlarni xavotirga solayotgani sababli bu borada qonunchilikda belgilangan talablar haqida ma’lumot berdi.
“Avvalo, bu borada mamlakatimizda mustahkam normativ huquqiy baza yaratilganini taʼkidlash kerak. Amaldagi hujjatlar asosida qurilish obyektlarida, avvalo, insonlarning xavfsizligini taʼminlash boʻyicha muayyan tizim asosida ishlar tashkil qilinadi. Xususan, maʼlum bir obyektning loyihasini tayyorlash uchun dastlab arxitektura rejalashtirish topshiriqlari ishlab chiqiladi, soʻng loyiha taklifi arxitektura kengashi tomonidan koʻrib chiqiladi”, — deydi vazirlik axborot xizmati rahbari.
Uning qayd etishicha, respublika hududlari seysmik ball koʻrsatkichlari boʻyicha zonalarga boʻlingan. Shundan kelib chiqqan holda, bosh rejalarda hududlarda obyektlarni joylashtirishda mazkur seysmik ball koʻrsatkichlari inobatga olinadi. Loyiha tashkilotlari tomonidan obyektlar hududning belgilangan seysmik ballidan kelib chiqqan holda loyihalashtiriladi.
Bundan tashqari, obyektni loyihalashtirishdan oldin u joylashgan yer maydoni boʻyicha topografik tasvir va geologik tadqiqot amalga oshiriladi, shuningdek, grunt tarkibi va xususiyatlari, sizot suvlar satxi va shu kabi boshqa masalalar ham oʻrganiladi.
Ushbu tadqiqot natijalaridan kelib chiqqan holda, obyektni joylashtirish, uning qavatlar soni, fundamenti, konstruksiyalari va gabarit parametrlari boʻyicha loyiha yechimlari tanlanadi. Mazkur jarayonlardan keyin obyektlar boʻyicha loyiha hujjatlarini ishlab chiqiladi.
Bunda, seysmik xavfsizlik va mustahkamlikni taʼminlashga qaratilgan shaharsozlik normalari va qoidalariga qatʼiy amal qilinadi. Obyektning loyiha hujjatlari tayyor boʻlgandan soʻng, vakolatli ekspert tashkilotlari tomonidan ekspertizadan oʻtkaziladi. Bunda ham seysmik xavfsizlik va mustahkamlik masalalari boʻyicha alohida koʻrib chiqiladi.
“Qayd etish kerakki, murakkablik dajarajsi 4-toifa obyektlari qoʻshimcha ravishda Fanlar akademiyasi huzuridagi Seysmologiya instituti tomonidan ham seysmik ekspertizadan oʻtkaziladi. Ushbu tizim boʻyicha prezident va hukumat qarorlari ham qabul qilinib, alohida tartiblar belgilangan. Obyekt loyihasida seysmik xavfsizlik va mustahkamlik masalalari toʻliq koʻzda tutilganligi boʻyicha ijobiy ekspretiza xulosalari olingach, qurilish ishlarini boshlashga ruxsat beriladi”, — deydi Saidnosir Usmonov.
Obyektlarning qurilish jarayonida esa 4 xil turdagi nazorat ishlari yuritiladi. Yaʼni, pudrat tashkilotining ichki nazorati, loyiha tashkilotining mualliflik nazorati, buyurtmachi tashkilotining texnik nazorati va Inspeksiyaning davlat nazorati yuritiladi. Obyektga olib kelingan qurilish materiallari va buyumlar sifati ham nazoratga olinadi. Bu tartib respublikning barcha qurilish obyektlariga taalluqlidir.
“Taʼkidlamoqchimizki, bugungi kunda qurilish ishlarida avvalo sifat va nazoratga birlamchi masala deb qaralmoqda va bu ishlar qatʼiy davom ettiriladi”, — deydi Qurilish va uy-joy kommunal xoʻjaligi vazirligi axborot xizmati rahbari.
Izoh (0)