Oshirilgan ballar, talabalar tomonidan jinoyatlar: Jismoniy tarbiya va sport universitetida qator kamchiliklar aniqlandi 

Oʻzbekiston davlat jismoniy tarbiya va sport universiteti va uning Fargʻona filialida qator kamchiliklar aniqlandi. Bu haqda Bosh prokuratura axborot xizmati xabar berdi. 

Xabarga koʻra, Bosh prokuratura tomonidan Yoshlar siyosati va sport vazirligi bilan birgalikda Oʻzbekiston davlat jismoniy tarbiya va sport universiteti faoliyati oʻrganilganida, bir qator xato va kamchiliklarga yoʻl qoʻyilgani aniqlandi. Xususan, oliygohga oʻqishga qabul qilishda qonunchilik talablari buzilib, qabul jarayonlarining shaffofligi taʼminlanmagan. Bundan tashqari, 

• ijodiy imtihonlarni oʻtkazish uchun  10 ta yoʻnalish boʻyicha 3 kishidan kam boʻlmagan tarkibda komissiya shakllantirilmagan;
• 21 ta sport turi boʻyicha oʻtkazilgan ijodiy imtihonlarda aynan bir shaxs bir vaqtda komissiyalarga raislik qilgan;
• 24 ta taʼlim yoʻnalishi boʻyicha 189 nafar abituriyentning imtihon natijalari bayonnomalarda haqqoniy aks ettirilmagan;
• 26 nafar abituriyentning ijodiy imtihon natijalari bayonnomalarda koʻrsatilmasdan, asossiz baholangan;
• ot sporti, xokkey, figurali uchish, togʻ changʻisi boʻyicha sport inshootlari mavjud boʻlmasa-da, 500 nafardan ortiq abituriyent shu yoʻnalishlarga oʻqishga qabul qilingan;
• 90 nafar abituriyentning ijodiy imtihon ballari oshirib qoʻyilib, talabalikka qabul qilingan.

Qayd etilishicha, buning oqibatida ijodiy imtihonlardan eng yuqori ball toʻplab, davlat granti asosida oʻqishga qabul qilingan 30 nafar talaba 1-semestr yakuni boʻyicha qoniqarsiz baho olgan. Xuddi shu kabi qonun buzilish holatlari universitetning Fargʻona filialida ham yoʻl qilgani aniqlangan.

Shu bilan birgalikda, universitetda oʻqishga qabul kvotalari ham sunʼiy ravishda oshirilib, 3 160 oʻrinli universitetga 13 634 nafar yoki sigʻimga nisbatan 4,5 baravar koʻp talabalar qabul qilingan. Soʻnggi 2 yilda talaba va oʻqituvchilar tomonidan jami 6 ta korrupsiyaviy va 23 ta boshqa turdagi jinoyatlar sodir etilgan. 

Qayd etilishicha, tekshirish davomida oʻtkazilgan tadbirda talabalar D.I. va J.S.lar fuqaro Gʻ.M.ni oʻqishga kiritish uchun undan 5 ming dollar olgan vaqtida ushlangan. Bundan tashqari, 587 nafar oʻqituvchi va xodimlariga 1,2 milliard soʻm ragʻbatlantirish pullari hamda oʻtilmagan dars soatlari uchun 172 million soʻm mablagʻ noqonuniy toʻlanib, talon-toroj qilingan. Hozirda aniqlangan qonun buzilishi holatlari yuzasidan jinoyat ishlari qoʻzgʻatilib, hozirda tergov harakatlari olib borilmoqda.