Nukus voqealari bo‘yicha sudlangan Polat Shamshetov 4-fevral kuni tergov hibsxonasida vafot etgandi. Nukus voqealarini o‘rganish hamda ular yuzasidan mustaqil tekshiruv o‘tkazish bo‘yicha komissiya uning o‘limi yuzasidan tekshiruv natijalarini e’lon qildi.
Unda qayd etilishicha, 7-fevral kuni komissiya aʼzolari Polat Shamshetovning oʻlimi sabablarini aniqlash maqsadida 4-sonli Tergov hibsxonasiga borib, u yerdagi sharoitlar, kamera yozuvlari, dastlabki tibbiy xulosa va boshqa tegishli hujjatlarni oʻrgandi. Shuningdek, marhum bilan bitta kamerada boʻlgan shaxslar va tergov hibsxonasi xodimlari bilan suhbat oʻtkazdi.
Marhum Polat Shamshetov bilan bir kamerada boʻlgan B.M. va Sh.S. bilan suhbatda, ular 3-fevral kuni nonushtadan keyin kamerada sud hukmini qayta-qayta oʻqigan, muhokama qilishgan, tushlikdan soʻng sayr qilishgach, kameraga qaytishgan. Ularning aytishicha, shu kunlarda P.Shamshetov koʻp tamaki chekkani tufayli nafas olishi ogʻirroq boʻlib qolgan. Xonadoshlarning soʻzlariga koʻra, oʻsha kuni marhum koʻp bezovtalangan, toʻsatdan ularning koʻz oʻngida hushini yoʻqotgan.
Kamera yozuvlarida marhum Shamshetovning oʻsha kundagi harakatlari, sanitariya-gigiyena xodimi va tez tibbiy yordamning operativ harakatlari aniq aks etgan.
4-fevral kuni soat 01:50 da Polat Shamshetovning sogʻligi yomonlashgani sababli kameradoshlari hibsxona tibbiyot boʻlimi shifokorini chaqirtirgan. Hibsxona tibbiyot boʻlimi feldsheri katta serjant D.Temirov kameraga kelgan vaqtida mahkum Shamshetov hushsiz holatda boʻlgan. Soat 02:15 da RSHTTYoIM Buxoro viloyati filiali tez yordam shifokori A.Gʻafurov va feldsher M.Raxmonov yetib kelgan vaqtda mahkum Polat Shamshetovning biologik oʻlim holatida ekani aniqlangan.
Oʻrganish davomida Buxoro viloyat sud tibbiy ekpertizasi tomonidan oʻtkazilgan tekshiruvlarning videoyozuvlari ham tahlil qilingan.
Shuningdek, komissiya aʼzolari marhum vafot etgan kunda oʻlim sabablarini aniqlash maqsadida Respublika shoshilinch tez tibbiy yordam ilmiy markazining Buxoro viloyatidagi filialidan jalb qilingan tez yordam shifokori A.Gʻafurov va feldsher M.Rahmonov hamda sud-tibbiy ekspertizasini oʻtkazgan Respublika Sud tibbiy ekspertiza markazi Buxoro viloyat filiali mutaxassislari bilan ham suhbatlashib, kerakli maʼlumotlarni olgan.
Bundan tashqari, mahbuslarga tasdiqlangan menyu asosida berilgan taomlar koʻrib chiqilib, oshxonadagi sharoitlar oʻrganilgan. Oʻrganish davomida marhumga nisbatan ruhiy yoki jismoniy qiynoq qoʻllanilishi mumkinligiga oid maʼlumotlar assosiz ekani aniqlangan.
Eslatib o‘tamiz, Qoraqalpog‘istonda yuz bergan holat va voqealarni o‘rganish hamda ular yuzasidan mustaqil tekshiruv o‘tkazish bo‘yicha komissiya 2022-yilning iyulida tuzilgan. Komissiya tarkibiga Oliy Majlisi vakillar va xalq deputatlari, nodavlat notijorat va jamoat tashkilotlari rahbarlari hamda xodimlari kiritilgan.
Izoh (0)