Farg‘onada yo‘lning qatnov qismi o‘pirilib tushdi

Farg‘ona viloyatida yo‘lning qatnov qismi o‘pirilib tushgani sababli yo‘l-transport hodisasi sodir bo‘ldi. Bu haqda viloyat yo‘l harakati xavfsizligi axborot xizmati xabar berdi. 

Xabarga ko‘ra, ijtimoiy tarmoqlarda tarqalgan yo‘lning qatnov qismi o‘pirilib tushganligi aks etgan fotoxabar boshqarma tomonidan o‘rganib chiqildi. O‘rganishda 1-fevral kuni  4K 923 Yaypan—Rapqon—Beshariq—Chilmaxram avtomobil yo‘lining  25-kilometrida yerosti sizot suvlarining yo‘l qoplamasi ostiga to‘plangani natijasida o‘pirilish sodir bo‘lgani aniqlangan. 

Qayd etilishicha, mazkur holat shu kunning o‘zida kerakli kuch-vositalar yordamida bartaraf etilib, avtomobillar qatnovi tiklangan. Yo‘ldagi nosozlik tufayli sodir bo‘lgan yo‘l-transport hodisasi natijasida Nexia rusumli transport vositasi haydovchisi, dastlabki ma’lumotga ko‘ra, yengil tan jarohati olgan. 

Ma’lum qilinishicha, hozirda ushbu holat yuzasidan Beshariq tumani IIB YHXG tomonidan o‘rganish ishlari olib borilmoqda.