AQSH prezidenti Jo Bayden 2024-yilgi prezidentlik saylovlarida qatnashish niyati borligini, ammo hozircha yakuniy qarorga kelmaganini ma’lum qildi. Bu haqda u PBS telekanaliga bergan intervyusida aytdi.
“Menda shunday (ikkinchi muddatga nomzod bo‘lish — “Daryo” izohi) niyat bor, lekin hali qat’iy qarorga kelganim yo‘q”, — dedi Bayden.
Jurnalistlarning undan yangi muddatda ishlashda yoshi tashvishlantirmaydimi, degan savoliga Bayden yoshi va sog‘lig‘i unga to‘sqinlik qilmasligi va prezidentlik vazifalarini bajarishga xalaqit bermasligini aytdi.
AQSHda 2024-yilgi prezidentlik saylovi vaqtida prezident Bayden 82 yoshga to‘ladi. Mamlakatda prezidentlik muddati to‘rt yil davom etadi.
The Wall Street Journal nashrining yozishicha, Baydenning maslahatchilari allaqachon uning saylovoldi kampaniyasiga tayyorgarlikni muhokama qila boshlagan. Jamoa hozir ko‘rib chiqayotgan mavzular — kampaniya shtabining tuzilishi, uning asosiy xodimlari, shuningdek, bo‘lajak shtabning qayerda joylashishi.
Shu bilan birga, Politico prezident hali yakuniy qarorga kelmaganini xabar qilgandi. U Virjiniya orollaridagi Sent-Krua shahrida ta’tilda bo‘lgan paytda oila a’zolari va kichik ittifoqchilar guruhi bilan bu masalani muhokama qilgan. Davlat rahbariga yaqin manbalarga ko‘ra, uning yana saylovlarda ishtirok etish ehtimoli “ortib bormoqda”.
Izoh (0)