Saudiya Arabistoni diplomatlari Afg‘oniston poytaxtida teraktlar xavfi yuqoriligi haqidagi ogohlantirishlar ortidan o‘tgan hafta oxirida Kobuldan Pokistonga ko‘chib o‘tdi. Bu haqda diplomatik muhitdagi manbalarga tayanib, Reuters axborot agentligi xabar bermoqda.
Saudiya diplomatlari Islomobodda qancha vaqt qolishni rejalashtirayotgani hozircha noma’lum.
O‘z navbatida, Afg‘onistonda hukumat tepasida turgan “Tolibon” harakati vakillari Kobulda xavfsizlik bilan bog‘liq muammolar yo‘qligini da’vo qilmoqda.
“Ular (Saudiya diplomatlari) xavfsizlik masalasini oʻz-o‘zidan tilga oldi, biz bu yerda hech qanday muammo koʻrmayapmiz, chunki Afgʻonistondagi, ayniqsa Kobuldagi xavfsizlik holati qoniqarli. Elchixonalar ko‘plab qo‘riqchilar bilan ta’minlangan”, — dedi “Tolibon” vakili Zabihulla Mujohid.
“Tolibon” rejimi dunyoning hech bir davlati tomonidan tan olinmagan bo‘lsa-da, ayrim davlatlar, xususan, Xitoy, Turkiya, Pokiston, Eron, Rossiya va boshqa ba’zi davlatlarning Kobulda diplomatik vakolatxonalari bor.
Sentabr boshida Kobuldagi Rossiya diplomatik missiyasi konsullik bo‘limiga kiraverishda ISHID a’zosi o‘zini portlatib yuborgandi. Umuman olganda, Afg‘onistonda tinch aholi yashaydigan joylar va masjidlarda tez-tez teraktlar sodir etilmoqda.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)