Samarqandda fuqarolarni Meksika orqali AQSHga yubormoqchi boʻlgan jinoiy guruhning yana bir aʼzosi ushlandi

Samarqand viloyatida fuqarolarni Meksika orqali AQSHga joʻnatmoqchi boʻlgan jinoiy guruhning yana bir aʼzosi qoʻlga tushdi. Bu haqda OʻzA xabar berdi. 

Xabarga koʻra, Davlat xavfsizlik xizmati Samarqand viloyati boshqarmasi hamda viloyat Ichki ishlar boshqarmasi  xodimlari hamkorligida oʻtkazilgan tadbirda fuqarolarni aylanma yoʻllar bilan AQSHga noqonuniy joʻnatayotgan jinoiy guruh aʼzolaridan birining faoliyatiga chek qoʻyildi. Buxoroda yashovchi, 1995-yilda tugʻilgan fuqaro noqonuniy yoʻllar bilan Yevropa ittifoqi davlatlari va Meksika orqali AQSHga joʻnatish bilan shugʻullangan.

Maʼlum qilinishicha, u samarqandlik fuqaroni AQSHga yuborish uchun 15 000 AQSH dollari soʻragan. Tezkor tadbir davomida M.F. ushbu puldan 3000 AQSH dollarini mahalliy fuqarodan olayotgan vaqtida qoʻlga olingan. 

Qayd etilishicha, hozirda ushbu shaxsga nisbatan Jinoyat kodeksining tegishli moddalari bilan jinoyat ishi qoʻzgʻatilib, tergov harakatlari olib borilmoqda.