Indoneziyada jangarilar Susi Air samolyotini uchuvchi va yo‘lovchilari bilan garovga oldi

Indoneziyaning Susi Air aviakompaniyasiga qarashli samolyot yangi zelandiyalik uchuvchisi va besh nafar yo‘lovchisi bilan Indoneziyaning G‘arbiy Papua provinsiyasida jangarilar tomonidan garovga olindi. Bu ma’lumotni Yangi Zelandiya bosh vaziri Kris Xipkins tasdiqladi, deb xabar bermoqda RNZ.

Nashr ma’lumotlariga ko‘ra, yengil motorli samolyot 7-fevral kuni G‘arbiy Papuadagi tog‘li hududga qo‘ngan. U yerda samolyot mintaqani Indoneziyaning qolgan qismidan ajratishni talab qilayotgan ayirmachilar guruhi tomonidan garovga olingan.

Reuters agentligining Indoneziya politsiyasi vakiliga tayanib xabar berishicha, politsiya xodimlari voqea joyiga yuborilgan. Shu bilan birga, u hodisa joyiga borish qiyinligini, buni faqat samolyotda amalga oshirish mumkinligini qayd etdi.

Yangi Zelandiya bosh vaziri Xipkinsning aytishicha, hukumat vaziyatdan xabardor, mamlakatning Indoneziyadagi elchixonasi xodimlari bu masala ustida ishlamoqda.

“Ular bizga nima yuz bergani va vaziyatni hal qilish uchun nima qilishayotgani haqida batafsil ma’lumot berishmadi, ammo biz bu masalada ish olib borilayotganidan xabardormiz”, — dedi Xipkins.

Yangi Zelandiya Tashqi ishlar vazirligi uchuvchining oilasiga konsullik yordami ko‘rsatmoqda. Yordam nimalardan iborat ekani ochiqlanmagan. Tashqi ishlar vazirligi buni shaxsiy daxlsizlik bilan izohlaydi.