“Daryo” kundaligida 8-fevral kuni sodir bo‘lgan eng muhim voqealar
“Daryo” nashri 8-fevralda O‘zbekiston va jahonda sodir bo‘lgan eng muhim voqealarni e’tiboringizga havola etadi.
Turkiya va Suriyada zilzila qurbonlari 9 ming kishidan oshdi, hozirda 70 dan ortiq mamlakat jumladan O‘zbekistondan qutqaruv guruhlari jo‘natilmoqda
So’nggi ma’lumotlarga ko’ra, Turkiyada zilzila oqibatida halok bo‘lganlar soni 7 ming kishidan oshdi, yana 50 mingga yaqin kishi jarohatlangan. Suriyada esa qurbonlar soni 2 500 kishidan oshgan, shuningdek, 4 500 dan ortiq kishi turli jarohatlar olgan.
Turkiya vitse-prezidenti Fuat Oktay ma’lum qilishicha, ofat joyida 16 139 ta guruh qidiruv-qutqaruv ishlarini olib bormoqda.
70 dan ortiq davlat, jumladan, O‘zbekiston qutqaruv guruhlari va boshqa ko‘rinishdagi yordamni yubordi.
Suriya davlat axborot agentligi SANA xabar berishicha, ayni vaziyatda hukumat nazoratidagi Aleppo, Latakiya, Xama, Idlib va Tartus viloyatlarida sodir bo‘lgan zilzila oqibatida kamida 812 kishi halok bo‘lgan.
6-fevral kuni Turkiyada mamlakat tarixidagi eng kuchli zilzilalardan biri sodir bo‘ldi va bu zilzila qo‘shni Suriyaga ham ta’sir ko‘rsatdi. 8-fevral holatiga ko‘ra, seysmologlar deyarli 650 ta yer silkinishini qayd etgan, ularning eng kuchlisi 7,6 magnitudali bo‘ldi.
Eron tarixdagi eng yirik harbiy mashg‘ulotlarga nisbatan yirik yerosti bazasini ochdi
Eron armiyasi AQSH va Isroilning qo‘shma mashg‘ulotlariga javoban o‘zining havodagi harbiy imkoniyatlarini namoyish qilish uchun yirik yerosti bazasini ochdi. Bu haqda Al Jazeera xabar berdi.
Eron davlat televideniyesi 7-fevral kuni Eagle 44 bazasidagi turli xil qiruvchi samolyotlar va harbiy uchuvchisiz samolyotlarni namoyish qildi. Mazkur bazaning qayerda joylashgani haqida ma’lumot oshkor qilinmagan.
Ta’kidlanishicha, baza AQSHning strategik bombardimonchi samolyotlaridan tashlab yuborilgan o‘q-dorilardan himoyalanish uchun tog‘larda joylashgan.
Yopiq majmua AQSH va Isroil minglab askar va o‘nlab samolyotlar, dengiz kemalari va artilleriya tizimlarini qamrab olgan tarixdagi eng yirik qo‘shma mashg‘ulotlarini o‘tkazganidan ikki hafta o‘tmasdan ochildi.
Bu qo‘shma mashg‘ulotlar, o‘z navbatida, Eron o‘zining harbiy tayyorgarligini ko‘rsatish uchun mashg‘ulotlar o‘tkazganidan bir necha kun o‘tib boshlangan.
Oxirgi oylarda Tehron va Moskva ikki tomonlama munosabatlarni tez sur’atlar bilan kengaytirayotgani sababli, Eron Rossiyadan yaqinda ilg‘or Su-35 qiruvchi samolyotlarini olishi mumkinligi haqida xabarlar paydo bo‘ldi.
Eron harbiy amaldorlari samolyotga qiziqish bildirgan, ammo yetkazib berish qachon amalga oshirilishi haqida izoh bermagan.
Rossiya ochiq dengizda neft eksporti rekordlarini yangilamoqda
O‘tgan haftada Rossiyadan dengiz orqali neft eksporti hajmi yana rekord darajaga yetdi. Bu haqda “RBK” xabar berdi.
Ma’lumotlarga ko‘ra, dengiz orqali neft tashish hajmining o‘sishi neft quvurlari orqali Yevropaga eksport hajmining pasayishi bilan deyarli to‘liq qoplandi.
Ammo neft yetkazib berish hajmi ortishiga qaramay, uning eksportidan Rossiya budjeti daromadlari kamayib bormoqda. Bu tashqi bozorlarda Rossiyaning Urals neftiga qo‘yilgan chegirma bilan bog‘liq.
Tankerlarda tashiladigan Rossiya neftining asosiy xaridorlari Xitoy, Hindiston va Turkiyaga aylandi. Haligacha manzili noma’lum bo‘lgan tankerlardagi neft hajmi hisobga olinsa (agentlik ularning ko‘p qismi ushbu mamlakatlarga ketishini taxmin qilmoqda), bu hududlarda yetkazib berish hajmi kuniga 3,29 million barrelga yetdi.
Bolgariya Yevropada dengiz orqali o‘tadigan Rossiya neftining yagona oluvchisi hisoblanadi. Ushbu mamlakat Yevropa Ittifoqi tomonidan Rossiya xomashyosini yetkazib berish embargosidan ozod qilingan yagona Yevropa davlati edi.
Mamlakat moliya vazirligining xabar berishicha, 2023-yil yanvarida Urals neftining o‘rtacha narxi bir barrel uchun 49,48 dollarni tashkil qilgan, bu o‘tgan yilning yanvar oyiga nisbatan salkam 2 baravarga kam qiymat.
Ayni vaziyatda Yevropa Ittifoqi va G7 mamlakatlari uchinchi davlatlarga yetkazib berilayotgan Rossiya neftining bir barreliga 60 dollardan narx chegarasini belgilagan.
O’zbekistonda zilzila sodir bo‘lsa, uylarimiz bunga bardosh bera oladimi?
Qurilish va uy-joy kommunal xoʻjaligi vazirligi tomonidan tashkil etilgan matbuot anjumanida jurnalistning “Bizda qurilayotgan uylar qanchalik zilzilaga bardoshli, tajribalar oʻtkazilganmi? Necha ballgacha kafolat bera olasizlar?”, mazmunidagi savoliga qurilish va uy-joy kommunal xoʻjaligi vaziri oʻrinbosarining javob berdi va u ijtimoiy tarmoqlarda keng muhokamalarga sabab boʻldi.
Davron Adilov bu savolga “Men 36 million odam qilayotgan ishga kafolat berolmayman. Davlat tarafidan o‘rnatilgan nazorat, joriy qilingan tartib-qoida va standartlarga kafolat berolaman. Qurilish ishlariga javobgar birinchi navbatda obyektning egasi, ya’ni binoni qurayotgan ‘boy ota’ javobgar”, — deb javob bergan.
Shundan so'ng vazirlik matbuot xizmati yuzaga kelgan holatga munosabat bildirib, videolavhada gap qurilishda javobgar, avvalo, buyurtmachi ekani xususida borganini ma’lum qildi.
Ta’kidlanishicha, Shaharsozlik kodeksining 5-bob, 26-moddasida qurilishni nazorat qilishda funksional majburiyatlar belgilab qoʻyilgan.
Obyektlarni qurish chogʻida qurilish ustidan davlat nazorati, buyurtmachining texnik nazorati, ishlab chiquvchining mualliflik nazorati va pudratchining ichki nazorati boʻlishi talab etiladi.
“Taʼkidlash kerakki, loyiha tashkilotlari tomonidan qurilishlar hududning 7,8 va yoki 9 etib belgilangan seysmik baliga koʻra rejali loyihalashtiriladi”, — deya tushuntirish bergan vazirlik o‘z munosabatida.
Ya’ni bunday jarayonlarda eng avvalo binoning yong'in xavfsizligi va seysmik bardoshliligi inobatga olinishi zarur.
