Checheniston rahbari Ramzan Qodirov Ukrainadagi “maxsus harbiy operatsiya” muvaffaqiyatli yakunlanganidan so‘ng shaxsan o‘zi Polshani “denasifikatsiya va demilitarizatsiya” qilish niyatida ekanini aytdi.
Qodirov bu haqda Polsha prezidentining Xalqaro siyosat byurosi rahbari Markin Pshidachning Varshava Vashingtondan Polsha Ukrainaga yuborgan harbiy texnikalar o‘rniga qurol jo‘natishini kutayotgani haqidagi so‘zlariga javoban gapirdi. Xususan, Pshidachning ta’kidlashicha, Amerikadan Polshaga Abrams tanklari va Patriot zenit-raketa tizimlari kelishi kerak. Uning qo‘shimcha qilishicha, Varshavaning maqsadi “Rossiyani tiyib turish”.
“Men satanizmga (iblisona harakatlar) qarshi kurash butun Yevropada va birinchi navbatda Polsha hududida davom etishi kerakligini bir necha bor taʼkidlaganman. Shunday qilib, polyaklar uchun vaqt keldi”, — deb yozdi Qodirov Telegram’dagi kanalida.
Uning so‘zlariga ko‘ra, Polshaning Sileziya mintaqasi “alohida mustaqil maqomga loyiq”, yildan yilga u yerda hududning avtonom bo‘lishi tarafdorlari ko‘paymoqda. Qodirovning fikricha, u yerda referendum o‘tkazilishi kerak va Rossiya uni o‘tkazishda “tashkiliy yordam bera oladi”.
Polsha Rossiyaning Ukrainadagi bosqini boshlanganidan so‘ng, mudofaani kuchaytirdi. 2022-yil iyul oyida Polsha Mudofaa vazirligi rahbari Marius Blashak mamlakatda Yevropa NATO davlatlari orasida eng kuchli quruqlikdagi qo‘shinlarni yaratishga va’da bergandi.
Xususan, Polsha AQSHdan qurol sotib olmoqda. Masalan, aprel oyida Varshava Vashingtondan 250 ta Abrams tankini sotib oldi. Birinchi jangovar zirhli texnikalar iyul oyi o‘rtalarida harbiy mashg‘ulotlarga yetib kelgan, dedi Blashak. Yetkazib berish 2026-yilda yakunlanishi rejalashtirilgan. Iyul oyi oxirida Qo‘shma Shtatlar NATOning “sharqiy qanotdagi Rossiya agressiyasini to‘xtatish” missiyasini qo‘llab-quvvatlash uchun Polshaga beshinchi avlod Boeing F-22 Raptor qiruvchi samolyotlarini yuborgandi.
Izoh (0)