15 daqiqa juda ko‘p vaqt bo‘lib ko‘rinadi. Ammo bu vaqt ichida juda ko‘p ishlarni bajarishingiz: nonushta tayyorlashingiz, seriallarning yarmini tomosha qilishingiz, shuningdek, sog‘lig‘ingizni yaxshilashingiz mumkin. Masalan, bu vaqt ichida piyoda sayr qilsangiz ham bo‘ladi, bu esa salomatlik uchun foydali hisoblanadi.
Piyoda yurish uzoq vaqtdan beri salomatlik uchun foydali bo‘lgan faoliyat turi sifatida tan olinadi. U yurak, miya faoliyatini yaxshilaydi, kayfiyatni ko‘tarishga yordam beradi. Piyoda yurish yugurishdan ko‘ra bo‘g‘inlaringizga yumshoqroq ta’sir ko‘rsatadigan va yuqori intensiv kardio faoliyatga qaraganda osonroq bo‘lgan ajoyib kardio mashq shaklidir.
Ko‘p insonlar kuniga 10 000 qadam piyoda yurish bilan mashg‘ul bo‘lishsa-da (kuniga shuncha qadam yurish kerak, degan fikr xato), siz atigi 15 daqiqa piyoda yurish bilan ham piyoda yurishning ko‘p afzalliklarini bilib olishingiz mumkin.
Kayfiyatingizni ko‘taradi
Ish kuningiz yomon o‘tdimi? Piyoda yurish paytida uni unutishga harakat qiling. Tadqiqotlar shuni ko‘rsatdiki, kuniga 10-15 daqiqa piyoda yurish xotirjam bo‘lishingizga va bo‘shashtirishga yordam beradi. Kuniga atigi 10-12 daqiqa toza havoda sayr qilsangiz, kayfiyatingiz aniq yaxshilanadi.
Ijodkorlikni rivojlantiradi
Stenford universiteti tadqiqotchilari 2014-yilda piyoda yurish ijodkorlikni oshiradi, degan xulosaga keldi. Ular piyoda yurish (ichkarida yoki tashqarida) o‘tirishdan ko‘ra “yangi g‘oyalar avlodi”ni (ijodiy fikrlash deb ataladi) yaxshilaganini aniqladi.
Bu ishdagi barcha vazifalar yurib bajarilishi kerak degani emas, ammo yangi ko‘rinish yoki yangi g‘oyalarni talab qiladigan insonlar bundan faqatgina foyda ko‘radi.
Uzoqroq umr ko‘rishga yordam beradi
15 daqiqalik piyoda yurish hech narsadek tuyuladi, ammo bu daqiqalar umr ko‘rish davomiyligini oshirishi mumkin. 2017-yilda American Journal of Preventive Medicine jurnalida chop etilgan tadqiqot shuni ko‘rsatdiki, haftasiga atigi ikki soat (bu kuniga atigi 15 daqiqadan ko‘proq) piyoda yuradigan insonlarda o‘lim xavfi umuman harakat qilmaydigan insonlarga qaraganda ancha past. Bu shunchaki har bir kichik harakat ham muhim ahamiyatga ega ekanini isbotlaydi.
Izoh (0)