“Daryo” nashri 7-fevralda O‘zbekiston va jahonda sodir bo‘lgan eng muhim voqealarni e’tiboringizga havola etadi.
Turkiyada sodir bo‘layotgan zilzila va uning ko‘payib borayotgan qurbonlari
Turkiyadagi falokatli zilzila qurbonlari soni 3 ming nafardan oshdi. Bu haqda Milliyet gazetasi Favqulodda vaziyatlar boshqarmasi ma’lumotlariga tayanib xabar bermoqda. Bundan tashqari 20 mingdan ortiq kishi jabrlangan. Ayni vaziyatda dunyoning 65 davlati Anqaraga yordam taklif qildi.
Suriya Sog‘liqni saqlash vazirligi ham mamlakatda zilziladan jabr ko‘rganlar haqida ma’lumot berdi. Unga ko‘ra, Suriyada 764 kishi halok bo‘lgan, 1 448 kishi jarohatlangan. Shu bilan birga, Al-Arabiya telekanali Suriyada 1,4 mingdan ortiq qurbonlar haqida yozmoqda.
Yevropa O‘rta Yer dengizi seysmologiya markazi ma’lumotlariga ko‘ra, 7-fevral kuni, Toshkent vaqti bilan 08:13 da Turkiyaning markaziy qismida 5,3 magnitudali yangi zilzila sodir bo‘lgan. Zilzila epitsentri Anqaradan 43 km, Besni shahridan 13 km uzoqlikda joylashgan. Zilzila o‘chog‘i 10 km chuqurlikda.
Turkiya favqulodda vaziyatlar boshqarmasi ham 5,3 magnitudali zilzila haqida xabar bergan.
Eslatib o‘tamiz, 6-fevral tongida Turkiyaning Gaziantep shahri yaqinida 7,5 magnitudali kuchli zilzila sodir bo‘ldi. Yer silkinishlari yana bir qancha viloyatlarda, shuningdek, Suriya va Livanda ham sezilgan. Ma'lumot uchun shu kuni Turkiya va yana 6 davlatda qator zilzilalar qayd etildi.
Ikki tomonga bo‘linayotgan Shveysariya, Ukrainaga qurol yetkazish mamlakat farovonligiga raxna soladimi?
Reuters agentligining ma‘lum qilishicha, Shveysariya Ukrainaga qurol yetkazib berish masalasida betaraflikdan voz kechishga yaqin turibdi.
Agentlikning ta’kidlashicha, mamlakat Germaniya va Daniyaning so‘rovini rad etganidan keyin unga bosim kuchaygan. Ayni vaziyatda Yevropa Ittifoqi mamlakatlari Berndan qurol-yarog‘ reeksport qilishga qo‘yilgan taqiqning yumshatilishini istaydi.
Shveysariya hozirgi paytda harbiylarga qurol jo‘nata olmaydi. Bundan tashqari, mamlakat Ukraina va Rossiyaga nisbatan alohida-alohida qurol embargo kiritgan.
Shveysariya parlamentlarining bu boradagi fikrlari ikkiga bo‘lingan. Mamlakatning o‘ng markazchi Erkin demokratik partiyasi yetakchisi Tyerri Burkart Kiyevga qurol yetkazib berishdan bosh tortish Moskvani qo‘llab-quvvatlashni anglatishini aytdi. “Bizdagi veto huquqi boshqalarning Ukrainaga yordam berishiga to‘sqinlik qilmasligi kerak”, — deydi u.
Sotomo tomonidan o‘tkazilgan so‘rov natijalariga ko‘ra, mamlakatdagi saylovchilarning 55 foizi' Ukrainaga qurol-yarog‘ reeksport qilinishiga' ruxsat berish tarafdori.
Shu bilan birga, Shveysariya Xalq partiyasi deputati Devid Suberbyuler qurolli to‘qnashuvda ishtirok etayotgan davlatga qurol jo‘natishiga ruxsat berish Shveysariyadagi “tinchlik va farovonlik poydevorini yo‘q qilishini” aytmoqda.
Ukraina prezidenti Yevropa ittifoqi yetakchilari bilan uchrashadi, bu Ukrainaga bosqindan keyin Yevropaga qilinadigan ikkinchi safar
Yevropa Kengashi rahbari Sharl Mishel Ukraina prezidenti Vladimir Zelenskiyni 9—10-fevral kunlari Bryusselda bo‘lib o‘tadigan Yevropa Ittifoqi yetakchilari sammitida shaxsan ishtirok etishga taklif qildi. Bu haqda Mishelning vakili Barend Leyts Twitter’da ma’lum qildi.
“Xavfsizlik nuqtayi nazaridan, boshqa ma’lumotlar berilmaydi”, — degan vakil.
Agar Zelenskiy Bryusselga kelsa, bu uning Ukrainaga keng miqyosli bosqindan keyin, mamlakatdan tashqariga ikkinchi safari bo‘ladi. Urush boshlanganidan beri uning yagona xorijiy tashrifi 2022-yil dekabr oyida Vashingtonga bo‘lgan. O‘shanda Zelenskiy AQSH prezidenti Jo Bayden bilan uchrashgan va Kongressning qo‘shma yig‘ilishida nutq so‘zlagan.
Financial Times Ukraina prezidentining Bryusselga tashrifi xavfsizlik nuqtai nazaridan bekor qilinishi mumkinligini taʼkidladi, buni Zelenskiyning oʻzi oʻtgan hafta jurnalistlar bilan suhbatda ham aytib o‘tgandi.
O‘rta Chirchiq tumanidagi umumta’lim maktabini xususiy maktabga aylantirilishi atrofidagi mojarolar va kutilayotgan yechim
Ijtimoiy tarmoqlarda Toshkent viloyatining O‘rta Chirchiq tumanidagi 20-maktab prezident maktabiga aylantirilgani, mahalliy aholi farzandlari boshqa hududdagi maktabga majburiy tarqatilgani haqida xabar berilgandi. Toshkent viloyati hokimligi mazkur muammoga munosabat bildirdi.
Hokimlikning rasmiy xabarida, ushbu umumta’lim maktabi tuman hokimi qarori asosida tugatilgani va bino ixtisoslashtirilgan maktabga aylantirilgani aytilgan. Ta‘kidlashlaricha, 20-maktab o’quvchilari maktab binosi hududidan 1 km uzoqlikdagi 49-maktabga joylashtirilgan.
Rasmiy xabarda qo‘shimcha qilinadiki, shu yil tuman investitsiya dasturi doirasida “Taraqqiyot” mahallasi uchun alohida maktab binosi qurilishi rejalashtirilgan.
Viloyat hokimi topshirig‘i bilan tuman hokimi Ixtiyor Qosimov va viloyat hokimining matbuot kotibi aholi bilan uchrashdi. Ota-onalarga holat bo‘yicha tushuntirish berildi”, — deyiladi hokimlik xabarida.
“Ota-onalar esa bundan norozi, yaqinda 12 yoshli o‘quvchi qiz bilan sodir bo‘lgan mudhish voqea ularni qo’rqitib qo‘ygan. Shu sababli 400 nafarga yaqin o‘quvchi ayni paytda maktabga bormayapti”, — deyiladi bu haqdagi xabarlardan birida.
Izoh (0)